Ադրբեջանի Նավթալանի շրջանի Միրհուրբանլի գյուղում նախօրեին «Ժողճակատ-Մուսավաթ» նախընտրական բլոկի թեկնածուի եւ շրջանի ընտրողների հետ հանդիպումը տեղի ոստիկանությունը տապալել է: Այս մասին տեղեկացնում է Turan լրատվական գործակալությունը: Սալյանում գործող Ժողովրդավարության աջակցության հասարակական միավորման ղեկավար Էմիլ Մամեդովը Turan -ին հաղորդել է, որ ոստիկանությունը հանդիպման մասնակիցներին պարտադրել է ցրվել: Սակայն հանդիման կազմակերպիչները ոստիկանության պահանջին չեն ենթարկվել, ինչից հետո «իրավապահները» հարձակվել են հավաքված ամբոխի վրա և ուժով ցրել հավաքը: Ոստիկանները ուժի կիրառման են դիմել՝ նույնիսկ անտեսելով այն փաստը, որ հանդիպման մասնակիցների մեջ մեծ թվով կանայք են եղել: Ոստիկաններին չի հաջողվել ձերբակալել «Մուսավաթ» կուսակցության ակտիվիստ, հանդիպման կազմակերպիչներից մեկին՝ Էլնուր Ֆարաջեւին, սակայն ոստիկանները ոստիկանության բաժանմունք են տարել նրա որդուն՝ Էլնուր Ֆարաջեւին: Առկա տեղեկությունների համաձայն՝ քաշքշուկի ընթացքում մեծ թվով մարդիկ, որոնց թվում քիչ չեն եղել կանայք, տարբեր աստիճանի վնասվածքներ են ստացել: Հանդիպման մասնակիցների նկատմամբ բռնություն կիրառելուց հետո այդ շրջանի մի խումբ բնակիչներ, հիմնականում՝ կանայք, մեկնել են Նավթալան՝ պահանջելով ազատ արձակել ձերբակալվածներին: Այս պահին գյուղը ոստիկանական ստորաբաժանումների կողմից պաշարման է ենթարկվել, ոստիկանական պարեկային խմբերն ամբողջ օրը հերթապահում են այնտեղ:
