Գեղարքունիքի մարզի ընդհանուր իրավասության դատարանում Յուրիկ Իսկոյանի նախագահությամբ սկսվում է Օլգա Ավագյանի գործի դատական քննությունը:
Օլգա Ավագյանն աշխատել է «Արդշինինվեստբանկի» Վարդենիսի մասնաճյուղում՝ որպես հաշվապահության մասնագետ: Ի պաշտոնե ունեցել է վճարման հանձնարարագրերի ընդունման, փոխանցման և այլ լիազորություններ:
Ըստ մեղադրանքի՝ Օլգա Ավագյանը իրեն ամրակցված համակարգչում ստեղծել է բանկի կողմից չշահագործվող, ակնհայտ կեղծ վճարման անդորրագրի ձև պարունակող էլեկտրոնային ֆայլ:
2013 թվականի փետրվարից մինչև հունիս ամիսը ներառյալ Օլգա Ավագյանը, գործելով մեկ միասնական դիտավորությամբ, իր լիազորությունները բանկի շահերին հակառակ ու իր օգտին օգտագործելով՝ իրագործել է իր հանցավոր մտադրությունը:
Նա մասնաճյուղի 51 վարկառուների կողմից բանկում գրավադրված ոսկե զարդերի դիմաց հատկացված գումարների մասնակի կամ լրիվ մարում կատարելու ժամանակ, օգտվելով այն բանից, որ վարկառուներն ու նրանց ընտանիքի անդամներն իրեն ճանաչել են որպես բանկի՝ երկար տարիների աշխատակցի, վստահել են, չարաշահել է նրանց վստահությունը, դրամարկղ մուտքագրելու համար նրանցից ստացել է վարկերի մարման գումարները՝ ընդհանուր՝ 7 միլիոն 146 հազար 100 դրամ, սակայն գումարները չի մուտքագրել նրանց հաշվեհամարներին:
Վճարում կատարողների մոտ վճարումը կատարած լինելու պատրանք ստեղծելու նպատակով Օլգան, ըստ մեղադրանքի, իր համակարգչով տպագրել ու նրանց է տվել վճարված գումարի չափը պարունակող, իրեն ամրակցված կնիքով դրոշմակնիքված, իր ստորագրությամբ հաստատված ակնհայտ կեղծ անդորրագրեր և խաբեությամբ հափշտակել է ամբողջ՝ 7 միլիոն 146 հազար 100 դրամը:
«Արդշինինվեստբանկը» հետագայում փոխհատուցել է 42 վարկառուներին իր աշխատակցուհու կողմից պատճառված վնասը՝ 6 միլիոն 778 հազար 624 դրամը, իսկ մնացած վարկառուների վնասները հատուցել է ինքը՝ Օլգա Ավագյանը:
Նախաքննական մարմինը Օլգա Ավագյանին մեղադրանք է առաջադրել քրեական օրենսգրքի 178 հոդվածի 3-րդ մասի 1-ին կետով և 214 հոդվածի 1-ին մասով:
Ավագյանի խափանման միջոցը ստորագրությունն է չհեռանալու մասին:
