«Առաջին լրատվական»-ի զրուցակիցն է «Քրստոնեա-Ժողովրդավարական վերածնունդ» կուսակցության նախագահ Սոս Գիմիշյանը:
-Պարոն Գիմիշյան, վերջերս հրատապ հարցազրույցով հանդես եկավ առաջին նախագահ Լևոն Տեր-Պետրոսյանը: Նա անդրադարձ էր կատարել սահմանադրական բարեփոխումների հայեցակարգին և նորից նշել, որ, իր տեղեկություններով, իշխանությունները պատրաստվում են ԲՀԿ-ի վրա լուրջ ճնշումներ գործադրել: Ո՞րնէ առաջին նախագահի մտավախության պատճառը, արդյոք «թեժ աշունը» կարո՞ղ է տապալվել հենց այն պատճառով, որ ԲՀԿ-ն իշխանությունների դեմ դուրս չգա:
–Շատ կարևոր է, որ ժողովուրդը վստահի այդ ուժերին: Ես կուզենայի, որ քաղաքական ուժերի մի խմբի գոնե ժողովուրդը վստահի, կանգնի ոտքի ու արդյունքների հասնի: Ցավում եմ, բայց քառյակի համարյա թե բոլոր ուժերը ժողովրդի վստահությանն արթնացնելու արդյունք չեն տվել: Ինչ վերաբերում է «Բարգավաճ Հայաստան» կուսակցությանը, ապա, իմ համոզմամբ, այն երբեք էլ չի եղել ընդդիմություն: Պատահական չէ հենց ոչիշխանական ձևակերպումը: Եթե կոչվեին ընդդիմություն, ապա «Բարգավաճը»չէր լինի քառյակի մաս:
ԲՀԿ-ն միշտ եղել է իշխանության ծնունդ, իշխանության որոշմամբ ձևավորված քաղաքական ուժ է, իշխանության մասն է կազմել, այսօր էլ շարունակում է կազմել: Այդ կուսակցությունը գլխավորում է օլիգարխ, օլիգարխը չի կարող երկրի իշխանության դեմ գնալ:
ԲՀԿ-ն մինչ այժմ երբեք չի պաշտպանել ընդդիմությանը: Վերցնենք նախագահական ընտրությունները. ո՛չ մասնակցեց, ոչ էլ պաշտպանեց որևէ մեկին: Իմիջիայլոց, այդ իմաստով ազնիվ է. միշտ էլ ասում է՝ այլընտրանք է, իսկ քաղաքականության մեջ այլընտրանքը նույնն է, ինչ ոչինչ:
–Երբ ներկայացվեցին այդ 12 կետերը, երկրորդ նախագահն իր հարցազրույցում համաձայնություն տվեց այդ կետերի մեծմասին. հնարավո՞ր է՝ աշնանը նա էլ քառյակի հետ միասին դուրս գա իշխանությունների դեմ:
–«Բարգավաճ Հայաստանը» ես միշտ համարել եմ Քոչարյանի ստեղծած քաղաքական կառույցներից մեկը, և պատահական չէ, որ նրա իշխանության ժամանակ ԲՀԿ-ն մի շարք այլ կուսակցությունների հետ կոալիցիայի մաս էր կազմում: Այո՛ Քոչարյանը ներգրավված է գործընթացի մեջ, բնական է, եթե կա ԲՀԿ, ապա այնտեղ կա նաև Ռոբերտ Քոչարյան, այսինքն՝ այդ համագործակցությունը ես տեսնում եմ:Չէի ասի, թե այդ գործընթացը հենց Ռոբերտ Քոչարյանի գլխավորությամբ է տեղի ունենում, բայց որ նա լիարժեք մասնակցում է՝ ինձ համար ակնհայտ է:
Երկրորդ՝ ես երբեք չեմ հավատա, որ Ռոբերտ Քոչարյանն ու Սերժ Սարգսյանը կարող են խոր քաղաքական հակասություններ ունենալ. նրանք նույն մարդն են, նույն թիմից են, նույն մոտեցումներն ունեն: Իհարկե, իրենց պատկանող բիզնեսներում շահերի բախում կլինի, բայց դրանք մանր-մունր հարցեր են, որ կլուծվեն:
Սերժ Սարգսյան և Ռոբերտ Քոչարյան հարբերություններն ակնհայտ են, հիմա առաջանում են Ռոբերտ Քոչարյան և Լևոն Տեր-Պետրոսյան հարաբերություններ:
–Բայց մարտի 1-ի հանգամանքը արդյոք չի՞ կաշկանդի Տեր-Պետրոսյանին. 10 զոհ ունեցանք, որից հետո Կոնգրեսը Քոչարյանին էր մեղադրում այն կազմակերպելու համար:
–Անմիջապես առաջանում է հաջորդ հարցը. մարտի 1-ի իրականացնողներից և ակտիվ գործող կառույցներից մեկը նաև ԲՀԿ-ն էր: Կոալիցիայի անդամ ուժերը քաղաքական պատասխանատվություն են կրում մարտի 1-ի համար՝ ՀՅԴ, ԲՀԿ, ՕԵԿ և ՀՀԿ: Այդ քաղաքական պատասխանատվությունը մի օր կարող է քրեական պատասխանատվության վերածվել:
Իսկ «Բարգավաճ Հայաստանի»մասով ես չեմ ասել, նույն Լևոն Տեր-Պետորսյանն է հայտարարել, թե ինչպիսի մասնակցություն են ունեցել՝ բազմաթիվ տվյալներ կան: Այդ դեպքում հարց է առաջանում, թե ինչպե՞ս են հիմա քառյակ կազմել ու միասին գոծում:
–Այսինքն՝ եթե Տեր-Պետորսյանին չի կաշկանդում ԲՀԿ-ի հետ համագործակցությունը, չի կաշկանդի նաև Քոչարյանի հետ համագործակցելը:
-Լևոն Տեր-Պետորսյանը հաճախ է կրկնում, որ հավերժ թշնամիներ և բարեկամներքաղաքականության մեջ չկան, երևի այդ մոտեցումներից ելնելով էլ ձևավորվում է այդ համագործակցությունը:
Հարցազրույցն ամբողջությամբ՝ մեր տեսանյութում:
