Եգիպտոսի գլխավոր դատախազ Թալաաթ Աբդալլան կարգադրել է սկսել եգիպտական ընդդիմության առաջնորդների՝ պետական հեղաշրջում կազմակերպելու գործի քննությունը։ Լրագրողներին այս մասին հայտնել են երկրի դատախազության ներկայացուցիչները:
Խորհրդարանի նախկին անդամ Մուհամմեդ Ալ-Օմդայի կողմից երկրի գլխավոր դատախազին ուղղված հայցում նշվում է, որ պետական հեղաշրջում կազմակերպելու մեջ անմիջապես մասնակցություն ունեն Եգիպտոսի լիբերալ-դեմոկրատական ընդդիմության առաջնորդները, մասնավորապես «Ադ-Դուստուր» աշխարհիկ կուսակցութան առաջնորդ, ՄԱԳԱՏԵ-ի նախկին ղեկավար Մուհամմեդ Ալ-Բարադեյը, «Եգիպտական կոնգրես»-ի առաջնորդ՝ ԱՊԼ–ի նախկին գլխավոր քարտուղար Ամր Մուսան, «Ալ-Վաֆդ» կուսակցության առաջնորդ Սեիդ Ալ-Բադաուին և «Եգիպտոսի ազգային շարժման» առաջնորդ, նախագահի նախկին թեկնածու Համդին Սաբահին: «Այս անձինք հանդիսանում են «Եգիպտոսի փրկության ճակատի» կազմակերպիչներ, որի անունից էլ եգիպտական ժողովրդին կոչ են անում ներկա իշխանություններին տապալել, մարդկանց հրահրում են գործող նախագահ Մուհամմեդ Մուրսիի դեմ բողոքի զանգվածային ցույցեր անցկացնելու՝ պահանջելով պետության ղեկավարից հրաժարվել Սահմանադրական հռչակագրից»,– -ասվում է հայցի մեջ:
Վերջին օրերին Եգիպտոսում երկրի երկու քաղաքական ուժերը զանգվածային ցույցեր են անցկացնում: Ընդդիմության շարժումը ղեկավարում են նշված քաղաքական գործիչները, որոնք բավականին հեղինակություն ունեն եգիպտացիների շրջանում: Նրանք անձամբ մասնակցել են զանգվածային ցույցերին, որոնք տեղի են ունեցել Կահիրեի Թահրիր հրապարակում:
Լիբերալ-դեմոկրատական ճակատը դեմ է նախագահ Մուհամմեդ Մուրսիի կողմից նոյեմբերի 22-ին ընդունված Սահմանադրական հռչակագրին, որը նրան լրացուցիչ լիազորություններ է շնորհում: Նրանք դեմ են նաև, որ Սահմանադրությունը շտապ դրվի ժողովրդական հանրաքվեի, որը նշանակված է դեկտեմբերի 15-ին: Իսկ իսլամիստները, մասնավորապես՝ «Մուսուլման եղբայրները» ի պաշտպանություն նախագահի վերջին որոշումների՝ ցույցերի են դուրս բերում իրենց կողմնակիցներին:
