Եթե պատերազմ լինի, մենք՝ մայրերս, զենք կվերցնենք և մեր տղաների փոխարեն կկռվենք: Այս մասին այսօր «Առաջին լրատվական»-ի հետ զրույցում ասաց «Զինվոր» ՀԿ նախագահ Մարգարիտա Խաչատրյանը՝ անդրադառնալով հայ-ադրբեջանական և ղարաբաղա-ադրբեջանական հակամարտ զորքերի շփման գծում առկա լարվածությանն ու պատերազմի վերսկսման վտանգին:
Նա նշեց, որ իրականում մենք երբևիցե չենք ունեցել զինադադար, մենք պաշտոնապես հայտարարել ենք, թե 94թ.-ից զինադադար ունենք, բայց չենք ունեցել: Ունեցել ենք դարանակալված թշնամի, որը ճակատ առ ճակատ պատերազմի դուրս չի գալիս, բայց դարանակալված՝ կյանքեր է խլում: Ըստ նրա՝ դա վախկոտության մի աստիճան է, որին մեր երեխաները պաշտպանում են՝ իրենց բռունցքով պաշտպանելով հայրենիքը, ինչի վառ ապացույցն է մեր տղաների հերոսությունը. իրենք իրենց հենակետում հայրենիքի պաշտպանության համար զոհվում են:
«Մենք՝ սևազգեստ մայրերս, պատվով ենք տանում նման վիշտը, քան սգում ենք անպատիվ ապրելու համար: Նրանց մայրերին կոչ կանեմ ու կհորդորեմ. կյանքեր խլելով, մայրերին սև հագցնելով՝ երբևիցե հայի ոգին չեն կարող կոտրել: Հայրենիքը մեկն է, ճակատագիրը մեկն է, ուստի մեր մայրերին մաղթում եմ ուժ, կորով, համբերություն, քանի որ վառ ապացույցն է, որ մենք կանգնած ենք մեր բալեքի կողքին և սատար ենք կանգնելու մեր բանակին, մեր հայրենիքին, մեր բալեքին: Եթե Աստված ոչ անի, պատերազմ լինի, մենք՝ մայրերս, զենք կվերցնենք և մեր տղաների փոխարեն կկռվենք»,- ասաց Մարգարիտա Խաչատրյանը:
Հարցին՝ լայնածավալ ռազմական գործողությունների մեկնարկի հնարավորություն կա՞, նա պատասխանեց՝ ոչ: «ՀՀ-ն չի պատրաստվում լայնածավալ հարձակումների, որովհետև մեր երդումն ու նշանաբանն է խաղաղ ճանապարհով լուծել Արցախի խնդիրը և ոչ թե զինվորի կյանքի գնով»,- ասաց նա՝ հավելելով, որ չի տեսնում ՀԱՊԿ-ին դիմելու անհրաժեշտություն, քանի որ հայ զինվորի ոգին այնքան բարձր է, որ հայ ժողովուրդն իր համբերությամբ կարողանում է իր հայրենիքը պաշտպանել:
Մանրամասները՝ տեսանյութում:
