Եվրահանձնաժողովը 1.5 մլրդ եվրոյով տուգանել է հեռուստացույցների և համակարգիչների մոնիտորների համար էլեկտրաճառագայթային խողովակների 7 միջազգային արտադրողներին՝ 10 տարվա վաղեմության կարտելային դավադրության համար:Այս մասին հայտնում է RIA Novosti-ն՝ հղում անելով Եվրահանձնաժողովի հաղորդագրությանը:
Ըստ տեղեկությունների՝ երկու կարտելների մասնակիցները եղել են՝ մի կողմում LG Electronics, Philips և Samsung SDI, մյուս կողմում՝ Panasonic, Toshiba, MTPD և Technicolor ընկերությունները:
1996–2006 թթ. այդ ընկերություններն իրականացրել են նախապես համաձայնեցված գնային և արտադրական քաղաքականություն, ինչպես նաև շուկայում մասնաբաժինների բաշխում են իրականացրել:
«Ընկերությունները կոպտորեն խախտել են հակամենաշնորհային օրենսդրությունը, որը կարգավորում է Եվրոպայում բիզնես ունեցողների գործունեությունը: Էլեկտրաճառագայթային խողովակները կարևոր բաղադրիչ մաս են հանդիսանում հեռուստացույցների և մոնիտորների արտադրությունում և կազմում արտադրանքի վերջնական գնի 50-70 տոկոսը»,- հայտարարել է Եվրահանձնաժողովի հակամենաշնորհային կոմիտեի ղեկավար Խոակին Ալմունիան: Նրա խոսքերով՝ այդ տուգանքը հանդիսանում է Եվրահանձնաժողովի կողմից կարտելների դեմ սահմանված տուգանքներից խոշորագույնը:
Եվրահանձնաժողովի հաղորդագրությունում ընդգծվում է, որ ընկերություններն իմացել են օրենսդրության խախտման մասին և միմյանցից պահանջել են այդ փաստը գաղտնի պահել:
