Այսօր հանրապետության լեռնային շրջաններում ձյուն է տեղացել: «Առաջին լրատվական»-ին այս մասին տեղեկացրեց «Հայպետհիդրոմետ» հիդրոօդերևութաբանական կենտրոնի օդերևութաբանական կանխատեսումների բաժնի պետ Գագիկ Սուրենյանը:
Նա նշեց, որ այսօր հանրապետության տարածք ներխուժեց ցիկլոն, որի արդյունքում Շիրակի, Գեղարքունիքի, Կոտայքի, Վայոց ձորի լեռնային շրջաններում դիտվել են տեղումներ` ձյան տեսքով: Ըստ Գ. Սուրենյանի՝ այս ձյունն ավելի վաղ պետք է տեղար. այդ շրջաններում ձյուն տեղում է նոյեմբերի սկզբին, իսկ հիմա արդեն դեկտեմբերի սկիզբն է:
«Այժմ ցիկլոնը գտնվում է թուլացման փուլում: Հանրապետությունում առաջիկա ժամերին տեղումները կդադարեն: Ամպամածությունը, ճիշտ է, վաղը կպահպանվի, բայց վաղը և մյուս օրը էական տեղումներ չեն լինի: Առաջիկա օրերին Երևանում ձյուն չի սպասվում»,- մանրամասնեց Գագիկ Սուրենյանը: