Իրավիճակը ամերիկյան բանկային համակարգում շարունակում է բարելավվել, ինչը վկայում է այն մասին, որ ազգային տնտեսությունն աստիճանաբար դուրս է գալիս ճգնաժամից: Ինչպես երեքշաբթի հաղորդել է Ներդրումների ապահովագրման ֆեդերալ ընկերությունը՝ ամերիկյան բանկերի եկամուտը 2012թ-ի երրորդ քառամսյակի համար կազմում է 37,6 մլրդ դոլար: Դա 6,6%-ով ավելի շատ է, քան անցած տարվա նույն շրջանում:
Փորձագետները նաև ուշադրություն են դարձնում այն հանգամանքին, որ 2009թ-ից առաջին անգամ բանկային եկամուտն աճել է շնորհիվ տրված վարկերի քանակի, այլ ոչ թե սեփական միջոցների խնայողության միջոցով:
Սպառողական վարկավորման բաժնում նկատվում է գրեթե 1%-ի աճ: Ներդրումների ապահովագրման ֆեդերալ ընկերության ղեկավար Մարտին Գրյունբերգն այս ձեռքբերումը համարում է շատ համեստ, սակայն կարևոր ցուցանիշ:
Միևնույն ժամանակ ամերիկյան շատ բանկեր հաղորդել են, որ շահույթը մեծացրել են շնորհիվ ոչ եկամտաբեր բաժնետոմսերի վաճառքի, վատ պարտքերի և աշխատատեղերի վերակազմավորման շնորհիվ:
Միևնույն ժամանակ նրանք բարձրացրել են իրենց ծառայությունների համար վճարումները, այդ թվում բարձրացրել են հաշվեհամարների բացման վճարները և վարկերի տոկոսները:
Ըստ ԱՄՆ-ի Ֆեդերալ պահուստային համակարգի տվյալների՝ 2008թ-ի վերջին քառամսյակում բանկային համակարգի կորուստները կազմում են 32 մլրդ դոլար: Վերջին հինգ տարիների ընթացքում սնանկացել է ավելի քան 450 վարկաֆինանսական ինստիտուտ:
Այս տարվա կեսերին ԱՄՆ-ում հաշվվում էր ավելի քան 7300 բանկ, նրանցից գրեթե 700-ը խնդիրներ ունեն:
