Մայիսի 4-ին խորհրդարանական ընտրությունների քարոզարշավի ընթացքում ՀՀԿ կազմակերպած նախընտրական միջոցառման ժամանակ փուչիկների բռնկման գործով մեկ տարվա ազատազրկման դատապարտված Սերոբ Բոզոյանը (ի դեպ, Սերոբ Բոզոյանը միակն է, ով պատասխանատվության ենթարկվեց փուչիկների գործով), ով տառապում է միզապարկի քաղցկեղով և նոյեմբերի 19-ից Ֆանարջյանի անվան ազգային ուռուցքաբանական կենտրոնում է, առաջիկա օրերին կենթարկվի վիրահատության, նրա միզապարկը կհեռացնեն: Վերջին ամիսների ընթացքում նրա առողջական վիճակը կտրուկ վատացել է:
«Արդեն պատրաստվում են վիրահատության, վաղն էլ հավանաբար կպատրաստեն, և կարող է` մյուս օրը վիրահատեն: Արդեն գտնում են, որ կարող են վիրահատել, միզապարկը շատ է ճյուղավորվել, պետք է հեռացնեն»,- ասաց Սերոբ Բոզոյանը: «Կես մարդ եմ դառնում»,- ասաց նա՝ հավելելով, որ ստամոքսում հայտնաբերված խոցերն այս ընթացքում բուժեցին: Բժիշկներին, ինչպես նաև իրենով հետաքրքրվողներին (իսկ այդպիսիք շատ են) Սերոբ Բոզոյանն անչափ շնորհակալ է:
Նա նշեց, որ իր միակ ցանկությունը երեխաներին իրենց նպատակներին հասցնելն է, իրեն հիմա մտատանջում է առողջությունը. «Մի թոռնիկ գոնե տեսնեմ, փոքրիկիս մեծացնեմ, շնորհքով մարդ դարձնեմ, թոռնիկներովս ուրախանամ, որ իմանամ՝ իզուր չեմ եկել ու գնացել այս աշխարհից»:
Ս. Բոզոյանի կինը՝ Մարինան, մեզ հետ զրույցում նշեց, որ դեղերի շնորհիվ Սերոբը հիմա իրեն վատ չի զգում, չի արնահոսում:
Ս. Բոզոյանն ունի երկու անչափահաս երեխա, փոքր որդին հիվանդ է, տառապում է բրոնխիալ ասթմա հիվանդությամբ, ընտանիքն էլ գտնվում է սոցիալական ծանր վիճակում:
Ս. Բոզոյանի փաստաբան Կարեն Մանուչարյանը ավելի վաղ «Առաջին լրատվական»-ին ասել էր, որ առաջին ատյանի դատարանի դատավճիռը բողոքարկվել է Վերաքննիչ դատարան, սակայն Վերաքննիչ դատարանը Սերոբ Բոզոյանի վատթարացած առողջական վիճակը հաշվի առնելով, ըստ երևույթին, կվերանայի գործը, և բավականին հիմքեր կան, որ նրա նկատմամբ պատժատեսակը վերանայվի:
Բոզոյանը միակ անձնավորությունն է եղել հայտնի միջոցառման կազմակերպման ընթացքում, որն ուղղակիորեն զգուշացրել է, որ մեթան գազով չի կարելի լիցքավորել փուչիկները (մեթանով փչած փուչիկների արժեքը 100-110 դրամ է, մինչդեռ հելիումով դրա գինը 6 անգամ ավելի թանկ է), սակայն այն գումարը, որը հատկացվել էր նրան՝ 700 հազար դրամ, կարելի էր լիցքավորել միայն և միայն մեթան գազով: Այս մեղմացուցիչ հանգամանքները հաշվի առնելով, Կարեն Մանուչարյանի դիտարկմամբ, Վերաքննիչ դատարանը կարող է փոփոխել վճիռը պատժի մասով:
