Քրդական Fırat լրատվական գործակալության հաղորդմամբ, Թուրքիայում ձերբակալվել է հերթական լրագրողը: Խոսքը Yüksekova Haber թերթի լրագրող Նեջիփ Չարփազի մասին է: Նրա, ինչպես նաև 11 այլ անձանց ձերբակալման վճիռն արձակել է Վանի հանրապետական դատախազությունը:
Ոստիկանությունը նախ խուզարկել է Յուքսեքօվա քաղաքում գտնվող Չարփազի տունը, ապա, նրան ձերբակալելով, տարել է Հաքքարիի անվտանգության ծառայություն: Առայժմ ձերբակալման պատճառների մասին ոչինչ չի հաղորդվում:
Նեջիփի կրտսեր եղբայր Էրքանը մտահոգություն է հայտնել իր եղբոր առողջապահական վիճակի կապակցությամբ, քանի որ նախորդ տարի նա ենթարկվել էր սրտի վիրահատության:
Նշվում է, որ ձերբակալվել են ևս 11 անձինք՝ Թուրքիայի հարավ-արևելյան հատվածում գտնվող Հաքքարի նահանգի շրջանային խորհրդարանի անդամներ ու քաղաքապետարանների աշխատակիցներ:
Հիշեցնենք, որ 2005 թվականի դեկտեմբերի 2-ին «Ժամանակակից լրագրողների միության» Բուրսայի մասնաճյուղը Նեջիփ Չարփազին շնորհել է «Մամուլի համերաշխության մրցանակը»: Չարփազը բազմիցս ենթարկվել է դիմակավոր անձանց հարձակումներին, որոնց պատճառը տեղական լուրերի լուսաբանումն է:
