2013թ. բյուջեի նախագծի վերջնական տարբերակում եկամուտները կազմում են 1 տրլն 32 մլրդ 800 մլն դրամ, ծախսերը՝ 1 տրլն 152 մլրդ 600 մլն դրամ, դեֆիցիտը՝ 119 մլրդ 800 մլն դրամ (նախնական տարբերակում եկամուտների՝ 1 տրլն 57 մլրդ 800 մլն դրամ, ծախսերի՝ 1 տրլն 181 մլրդ 800 մլն դրամ, դեֆիցիտի (պակասուրդը)՝ 124 մլրդ դրամի փոխարեն):
Այսօր Ազգային ժողովում ֆինանսների նախարար Վաչե Գաբրիելյանը հայտնեց, որ ստացվել էին 406 առաջարկություններ, ամբողջությամբ կամ մասնակի ընդունվել է 67-ը:
«Առաջարկությունների մերժման հիմքում դրված է պետական կառավարման ծախսերի պահպանումը նույն մակարդակում»,- նշեց Վ. Գաբրիելյանը:
Նախարարը նշեց, որ դրամի փոխարժեքը փոփոխվել է, և դրամաշնորհների գծով մուտքերը ավելացել են 2.6 մլրդ դրամով: Նաև նոր դրամաշնորհ է տրվում մետրոպոլիտենի ծրագրի համար: 177 մլն դրամով ավելացել են հարկային եկամուտները: Սուբսիդիաներ տրամադրվում են էլեկտրոնային տրանսպորտի, ջրի և մետրոյի ոլորտներին:
Թեև նախարարին 1 ժամ տրվեց բյուջեի փոփոխությունները և առաջարկությունները ներկայացնելու համար, սակայն նախարարը սահմանափակվեց մոտ 10 րոպեով:
Պատգամավոր Էդմոն Մարուքյանը արձանագրեց, որ նախարարը պարտավոր էր ներկայացնել առաջարկությունները, որը չարեց, և դրանով խախտեց ԱԺ կանոնակարգ օրենքը:
