Կոտայքի մարզի ընդհանուր իրավասության դատարանում Յուրի Բաղդասարյանի նախագահությամբ ընթանում էր Պետրոս Գրիգորյանի և Ռաֆիկ Հակոբյանի գործի դատական քննությունը:
Ըստ մեղադրանքի՝ 57-ամյա Պետրոս Գրիգորյանը 2013 թվականի հուլիսի 9-ի երեկոյան՝ ժամը 20-ի սահմաններում Կոտայքի մարզի Մրգաշեն գյուղի գերեզմանատանը հանգուցյալ համագյուղացի Իշխանի գերեզմանափոսն է փորել 67-ամյա համագյուղացի Ռաֆիկ Հակոբյանի հետ:
Նրանց է մոտեցել Սիմոն Բաբայանը:
Պետրոսն ու Սիմոնը վիճաբանել են:
Պետրոսը հենց թարմ գերեզմանափոսի մոտ իր ձեռքին եղած քլունգով, ինչպես նաև ոտքերով հարվածներ է հասցրել Սիմոնի գլխին ու մարմնի այլ մասերին և դիտավորությամբ նրան զրկել է կյանքից:
Ժամը 23-ի սահմաններում Պետրոսն իր հետ գերեզմանափոս փորող Ռաֆիկի հետ Սիմոնի դիակը տեղափոխել է գերեզմանատնից մոտ 400 մետր հեռավորության վրա գտնվող Արզնի-Շամիրամ ջրանցքի մոտ, որտեղ սպանվածի դիակը նետել է ջրանցքը:
Պետրոս Գրիգորյանին մեղադրանք է առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Ռաֆիկ Հակոբյանին մեղադրանք է առաջադրվել առանձնապես ծանր հանցագործությունը պարտակելու համար՝ ՀՀ քրեական օրենսգրքի 334 հոդվածի 1-ին մասով:
Պետրոս Գրիգորյանը գտնվում է կալանքի տակ, իսկ Ռաֆիկ Հակոբյանի խափանման միջոցը ստորագրությունն է չհեռանալու մասին:
Որպես իրեղեն ապացույց՝ առգրավված են սպանության գործիք քլունգն ու մեկ զույգ զինվորական երկարաճիտ կոշիկներ:
2014 թվականի հուլիսի 2-ին ամբաստանյալ Ռաֆիկ Հակոբյանի որդուց դատարան է ստացվել դիմում, համաձայն որի՝ հայրը՝ 67-ամյա Ռաֆիկ Հակոբյանը օրեր առաջ՝ հունիսի 22-ին, մահացել է:
Դատարանը ամբաստանյալի մահվան կապակցությամբ նրա մասով քրեական գործի վարույթը կարճեց ու նրա նկատմամբ քրեական հետապնդումը դադարեցրեց:
Առաջիկա դատական նիստին ամբաստանյալի աթոռին մեկ մարդ կնստի՝ սպանության համար մեղադրվող Պետրոս Գրիգորյանը:
