Իրանական IRNA լրատվական գործակալության փոխանցմամբ՝ Իրանում Շվեդիայի նոր դեսպան Փիթեր Թիլերն իր հավատարմագրերն է հանձնել նախագահ Մահմուդ Ահմադինեժադին: Շվեդ դեսպանը հայտարարել է, որ Իրանի միջուկային ծրագրի հարցը պետք է որոշվի բացառապես դիվանագիտական ճանապարհով:
Ահմադինեժադն իր հերթին հայտարարել է. «Զեկույցների պատրաստման հարցում ԱՄՆ-ը ճնշումներ է գործադրում ԱԷՄԳ-ի վրա, ինչը, սակայն, չի լուծի քաղաքական խնդիրը: Իրանը չունի ատոմային զենք և երբեք էլ չի ձգտել դրա ստեղծմանը՝ այն համարելով որպես ոչ արդյունավետ զենք: Ատոմային ռումբին տիրելը չի կարող լուծել երկրի սոցիալական ու տնտեսական խնդիրները, ինչպես, օրինակ, Մեծ Բրիտանիայում և Ֆրանսիայում է, որոնք վիթխարի միջոցներ են ծախսում այդ զենքի պահպանման վրա:
Ներկայիս աշխարհում ստեղծվել է այնպիսի իրավիճակ, որ մյուս երկրները չեն կարող ունենալ ատոմային զենք: Աշխարհում եկել է հումանիզմի ու մշակույթի դարաշրջանը: Ատոմային զենքն անհրաժեշտ է եղել միայն այն ժամանակ, երբ մի քանի երկրներ ցանկացել են գերիշխել աշխարհում: Ներկայիս աշխարհում գերիշխում են հումանիզմն ու ազատ մտածելակերպը»: