Եվրասիական պրոյեկտները սառեցվել են. Հայաստանը ստիպված կլինի պաուզա վերցնելու ինտեգրման հարցում: «Առաջին լրատվական»-ի հետ զրույցում այս մասին ասաց Պետդումայի նախկին պատգամավոր, ՌԴ քաղաքական հետազոտությունների կենտրոնի ղեկավար, ՌԴ հանրային պալատի ներկայացուցիչ, քաղաքագետ-տնտեսագետ Սերգեյ Մարկովն՝ անդրադառնալով եվրասիական պրոյեկտների ձևավորման վրա Եվրամիության երկրներ Ռուսաստանի նավթի և գազի ներկրումների հնարավոր արգելքի ու պատժամիջոցների երրորդ փաթեթի ազդեցությանը:
Նա նշեց, որ սառեցված են եվրասիական ինտեգրման պրոյեկտները, իրականացվում են միայն այն որոշումներն ու պայմանավորվածությունները, որոնք ձեռք են բերվել նախկինում, իսկ նոր որոշումներ, ընթացիկ գործընթացներ ներկայումս չկան: Ըստ նրա՝ սա պայմանավորված է այն հանգամանքով, որ Ռուսաստանը պատերազմի մեջ է մտել Արևմուտքի, մասնավորապես՝ ԱՄՆ-ի դեմ, ԱՄՆ-ն ագրեսիվ կերպով հարձակվում է Ռուսաստանի վրա, ուստի այն երկիրը, որը գտնվում է պատերազմի մեջ, չի կարող զբաղվել այլ գործերով, ինտեգրման պրոյեկտներով, առավել ևս, երբ փորձագետները տեղի ունեցողը որակում են որպես հիբրիդային պատերազմ, այսինքն՝ տեղեկատվական և դիվանագիտական, պատժամիջոցների պատերազմների համադրում: «Մենք գիտենք, որ ԱՄՆ-ը Ռուսաստանի հետ պատերազմելու է մինչև վերջին ուկրաինացին»,- նշեց նա՝ հավելելով, որ այս վիճակում անմիտ է մտածել ինտեգրման պրոյեկտների մասին: Տնտեսագետ Սերգեյ Մարկովն ասաց, որ դժվարությամբ, բայց, անկասկած, Ռուսաստանը կհաղթահարի նոր պատժամիջոցները՝ դրանց նշանակման դեպքում: Ավելին, նրա համոզմամբ, պատժամիջոցների նոր փաթեթը դրականորեն կանդրադառնա ՌԴ տնտեսության վրա, կսթափեցնի ՌԴ կառավարությանը՝ ուղղորդելով իրականացնել բարեփոխումներ ներսում՝ հույսը չդնելով Արևմուտքի վրա: «ՌԴ-ն կսկսի աշխատել իր ներքին պոտենցիալի զարգացման վրա»,- ասաց նա:
Ինչ վերաբերում է Հայաստանի կողմից Եվրասիական տնտեսական միությանը միանալու մասին փաստաթղթի ստորագրմանը, ապա, նրա խոսքով՝ Հայաստանի հետ կապված ծրագրերը չեն փոփոխվի: Պարզապես չի բացառվում, նրա խոսքով, որ Հայաստանը մտնի մի փուլ, որը կլինի չպարտավորեցնող եվրասիական պրոյեկտներին միանալու տեսանկյունից: «Հայաստանը կփորձի ինչ-որ պաուզա վերցնել, մինչև ավարտվի Ռուսաստանի և ԱՄՆ-ի դիմակայությունը, իսկ մինչ այդ եվրասիական պրոյեկտները սառեցվում են»,- ասաց նա:
Հիշեցնենք, որ վերջերս ՀՀ վարչապետ Հովիկ Աբրահամյանն էր ասել այն մասին, որ Հայաստանը ԵՏՄ անդամակցության փաստաթուղթը կստորագրի հոկտեմբեր ամսին, այնինչ մինչ այդ նշել էր, որ Հայաստանը կմիանա մինչև տարեվերջ: