ՀՀ կառավարությունը Ազգային ժողով է ներկայացրել «Մաքսային օրենսգրքում փոփոխություններ և լրացումներ կատարելու մասին» օրինագիծը: Այսօր ֆինանսների փոխանախարար Սուրեն Կարայանը պատգամավորներին ներկայացրեց հիմնական փոփոխությունները։
Մաքսային օրենսգրքի 87-րդ հոդվածով նախատեսվող փաստաթղթերը 2 աշխատանքային օրվա ընթացքում ընդունվում են տեղափոխվող ապրանքի համար և որոշվում է 87-րդ հոդվածով սահմանված արժեքը (ինվոյսային արժեքը): Մերժման դեպքում գրավոր տեղեկացվում է հայտատուին 2 օրվա ընթացքում, կամ ներկայացնում են արժեքը, չափը և դրա որոշման մեթոդը: Արժեքը պետք է հիմնավորեն, մերժումը՝ նույնպես, որի դեպքում ներկրողը կարող է ներկայացնել լրացուցիչ տեղեկություններ:
Վերանայվում է տուգանքների ինստիտուտը, որ տուգանքների կիրառման բազան լինի բյուջե վճարման գումարը, ոչ թե մաքսային արժեքը, նաև առաջարկվում է, որ մաքսային հայտարարագրերում սխալների դեպքում, եթե հարկերի մասով պակասեցում չի լինում, այսօրվա 100%-ի փոխարեն վճարեն 50% տուգանք: Հարկերի պակասեցման դեպքում տուգանքը կկիրառվի պակաս վճարի 50% չափով:
Կարայանը նշեց, որ մաքսային արժեքները համապատասխանեցնում են ԱՊՀ երկրներում կիրառվող դասակարգչին:
ՀՀԿ-ական պատգամավոր Կարեն Ճշմարիտյանը նկատեց, որ մաքսային մարմնում կան անբարեխիղճ աշխատողներ, և պրակտիկայում համեմատություններն անում են շուկայում գործող գների հետ, և այլ պահանջներ են ներկայացվում. «Պետք է ճշտվի և նշվի, որ համեմատություններն արվում են այլ մաքսային որոշված արժեքի հետ»:
