Կառավարությունը 2014թ. հունիսի 4-ի N 596-Ն որոշմամբ տարածքներ վարձակալելու համար իր պահուստային ֆոնդից 72 մլն 240 հազար դրամ է հատկացրել Պետգույքի կառավարման վարչությանը: Որոշման համաձայն` Ֆինանսների նախարարության համար «Հանարդնախագիծ» ընկերությունից վարձակալության է վերցվել 2150 քառակուսի մետր տարածք:
Նույն որոշման 5-րդ կետի համաձայն` պետական մեկ այլ գերատեսչության՝ ՀՀ կառավարությանն առընթեր ճարտարապետության պետական կոմիտեի համար նույնպես տարածք է վարձակալվել նույն՝ «Հանարդնախագիծ» ընկերությունից: Ընդ որում` այս կոմիտեի համար նախապես մեկ տարի՝ մինչև դեկտեմբերի 31-ը, ժամկետով է տարածք վարձակալության վերցվել: Սակայն վերը նշված որոշմամբ ժամկետը փոխվել է մինչև հունիսի 1-ը, այսինքն` 5 ամսով: Փոփոխության է ենթարկվել նաև վարձավճարը և 5 ամսվա համար հատկացվել է 13 մլն 667 հազար դրամ:
Թե այս որոշումը և թե վարձակալության համար կառավարության պահուստային ֆոնդից տասնյակ միլիոնների հասնող գումարներ վարձակալության համար տրամադրելը կարող է այնքան էլ արտառոց չթվային, եթե չլիներ ևս մեկ հանգամանք: «Հանարդնախագիծ» ընկերությունը, որին կառավարությունը հսկայական գումարներ է վճարում և տարածքներ է վարձակալում, մամուլի բազմաթիվ հրապարակումների համաձայն, պատկանում է Կոտայքի մարզպետ կամ բնապահպանության նախկին նախարար Արամ Հարությունյանին:
«Հանարդնախագիծ» ընկերությունը կամ այդ տարածքները գտնվում են Հանրապետության հրապարակի անմիջական հարևանությամբ՝ Պետգույքի կառավարման վարչության շենքի շարունակությամբ և կառավարության շենքի ուղիղ դիմաց՝ Տիգրան Մեծի 4 հասցեում: Տարիներ առաջ` 2006թ., այդ շենքի վրա ավելացվեց լրացուցիչ՝ 6-րդ հարկը:
Իսկ շենքը բավականին հետաքրքիր պատմություն է ունեցել և կապ է ունեցել ոչ միայն Ա. Հարությունյանի, այլև վարչապետ Հովիկ Աբրահամյանի հետ: Մամուլում եղած նույն հրապարակումների համաձայն` տարիներ առաջ, երբ նա եղել է տարածքային կառավարման նախարար, և նրա լիազորություններն ընդլայնվել են, նրա ղեկավարման ոլորտում որոշ կառույցներ են ավելացել, ու նա դարձել է սուպերնախարար, կառավարությունից իր համար նախարարության շենք է պահանջել: Կառավարությունը նրան հատկացրել է Պետական գույքի կառավարման վարչության տարածքները, որոնք գտնվում էին, հիշեցնենք, կառավարության այն շենքում, որտեղ այժմ գտնվում է Տարածքային կառավարման նախարարությունը: Իսկ Պետգույքի կառավարման վարչությունը տեղափոխեցին «Հանարդնախագիծ» ինստիտուտի շենք: Հետո կառավարությունը 2005թ. 304 որոշմամբ իր բաժնեմասը՝ 4600 քմ, հանձնեց այդ վարչությանը: Բայց շենքի այն մասը, որը պետք է զբաղեցներ վարչությունը, ուներ ընդամենը 4100 քմ, մնացած 500 քմ-ը պետք է կտրվեր ինստիտուտի անկյունային շինությունից, ինչը հարմար չէր: Երեք կողմերով փոխհամաձայնության են եկել և որոշել են, որ այդ միջանկյալ կառույցը մնա ինստիտուտին, դրա փոխարեն ինստիտուտը Պետգույքի կառավարման վարչության թևի վրա իր միջոցներով ավելացնի 6-րդ հարկ և փակի 500 քմ-ի պարտքը: Ինչը և արվել է:
Այս շենքն իր մեծությամբ ու դիրքով շատերին է գայթակղել: Ժամանակին դրա վրա աչք ուներ նաև քաղաքաշինության նախկին նախարար Ֆելիքս Փիրումյանը: Ասում են՝ շենքը շատ էր դուր եկել Գործարարների միության նախագահ Արսեն Ղազարյանին ու բազմաթիվ կուսակցությունների ղեկավարներին, բայց չեն կարողացել ձեռք բերել: Իսկ վերը նշված 6-րդ հարկի շինարարությունը կատարվել է այն ժամանակ, երբ նույն Ա. Հարությունյանը քաղաքաշինության նախարարն էր: Այնուհետև «Հանարդնախագծի» շենքի նկուղային հարկում ինչ-որ օբյեկտի շինարարություն էր իրականացվում, որը նույնպես կապվում էր Ա. Հարությունյանի հետ: Վերջինս, ասում են, տարիներ շարունակ վայելել է տարբեր բարձր պաշտոններ զբաղեցրած Հ. Աբրահամյանի հովանավորությունն ու նրա շնորհիվ ինքն էլ բարձր պաշտոններ է զբաղեցրել: Ասում են` ոչ առանց վարձահատույցի:
Իսկ այս պարագայում խնդիրն այն է, որ պետական բյուջեից հսկայական գումար է հատկացվում Ա. Հարությունյանի անվան հետ կապ ունեցող «Հանարդնախագիծ» ընկերության տարածքները վարձակալելու համար: Այս երևույթը խիստ բնորոշ է մեր իրականությանը: Հայաստանի շատ պաշտոնյաներ իրենց ղեկավարած գերատեսչության գումարները տարբեր ճանապարհներով հաճախ են ուղղում սեփական գրպանը: Ստեղծում են մասնավոր ընկերություններ և իրենց ղեկավարած գերատեսչական գնումները կատարում են այդ ընկերության միջոցով՝ շահույթն իրենց գրպանն ուղղորդելով: Պետական գումարները գրպանելու մեկ այլ տարբերակ է նաև պետական շինությունները սեփականացնելն ու դրանք պետական միջոցներով տարբեր գերատեսչություններին վարձով տալը: Ահա այսպես էլ պետության հաշվին հարստանում են մեր պաշտոնյաները: Տարիներ առաջ հրապարակումներ եղան, թե Կենտրոնի նախկին թաղապետ Գագիկ Բեգլարյանը սեփականացրել է թաղապետարանի շենքն ու այն վարձով տվել նույն թաղապետարանին: