Ավստրիայի արտաքին գործերի նախարար Սեբաստիան Կուրցը դեմ է արտահայտվել Ռուսաստանի նկատմամբ տնտեսական պատժամիջոցների ընդունմանը, սակայն կողմ է զինամթերքի վրա էմբարգո դնելուն: Այս մասին հայտնում է ավստրիական Kurier պարբերականը:
Կուրցը հիշեցրել է, որ դեռ փետրվարին առաջարկում էր արգելել Ռուսաստան զենքի մատակարարումը:
«Այն ժամանակ առաջարկը չստացավ մեծամասնության աջակցությունը: Այսօր ես այնպիսի զգացողություն ունեմ, որ գնալով ավելի շատ արտգործնախարարներ են կողմ դրան»,- ասել է Կուրցը Բրյուսելում, որտեղ մեկնել է՝ մասնակցելու ԵՄ անդամ երկրների ԱԳՆ ղեկավարների հանդիպմանը:
Նա նշել է, որ ՌԴ տնտեսության ամբողջական ոլորտների նկատմամբ պատժամիջոցներ սահմանելու հարցը պետք է քննարկեն ԵՄ երկրների ղեկավարները: Ուստի այսօր այդպիսի պատժամիջոցների հարց դրված չէ՝ նշել է նա:
Ուկրաինայի տարածքում մալայզիական ինքնաթիռի կործանումից հետո ԱՄՆ-ը և ԵՄ երկրները բանակցում են Ռուսաստանի դեմ պատժամիջոցների խստացման հարցի շուրջ:
