Հոդվածագիր, վերլուծաբան Անդրանիկ Բաբախանյանի կարծիքով՝ կիսանախագահական կառավարման համակարգը խորհրդարանականի փոխելը ոչինչ չի տա:Նրա խոսքերով՝ դրանք նույն բանն են, մեզ մոտ երբեք չի եղել կիսանախագահական համակարգ:
«Մեզ մոտ ավտորիտար համակարգ է, ստի վրա նորը չես կառուցի: Մեր սահմանադրությունը կեղծված է: Ամբողջ իշխանությունը պատկանումէ մեկ մարդու՝ նախագահին, համակարգը փոխելուց հետո էլ վարչապետին կպատկանի, ոչ մի էական փոփոխություն»,- «Առաջին լրատվական»-ի հետ զրույցում ասաց Բաբախանյանը:
Նրա խոսքերով՝ Հայաստանում Սահմանադրական դատարանն իրեն այնքան է որակազրկել, որ պարզապես պետք է փակել․ «Այն մեր պետությանն այնքան մեծ վնաս է հասցրել, որ ավելին չի էլ կարող անել: Գագիկ Հարությունյանը որոշումներ ընդունելիս սպասում է, թե ինչ կասի իրեն նախագահը, այնինչ, այդ դատարանը պետք է միանգամայն անկախ գործի»,- ասաց մեր զրուցակիցը:
Նա պատմեց, որ մի անգամ՝ դեռ տարիներ առաջ, պատիվ է ունեցել մասնակցելու հանձնաժողովի նիստերին. այդ ժամանակ ևս Գ․ Հարությունյանը ցույց է տվել, թե կեղծիքի ինչ վարպետ է․ «Հանձնաժողովի 9 անդամներից 4-ն են ներկա եղել։ Հարությունյանը հայտարարել է՝ քվորում կա, կարող ենք սկսել: Ես հետո դիմում գրեցի, որ ինձ պարզաբանում տան, բայց չտվեցին, հետո իրենք էլ գրեցին, որ քվորում չի եղել»,-պատմեց Բաբախանյանը՝ հավելելով, որ նման մարդը ոչ մի բարեփոխում էլ չի կարող մտցնել:
Նրա դիտարկմամբ՝ մեր իշխանությունները պարզապես ձգտում են ավտորիտար մի ռեժիմը փոխարինել մեկ ուրիշով, և բացարձակապես տարբերություն չկա, թե այն ինչպես կկոչվի։
Հարցազրույցն ամբողջությամբ՝ մեր տեսանյութում։