Խորհրդարանական ամբիոնից բազմաթիվ առիթներ եմ ունեցել խոսելու քաղաքաշինության խնդիրներից: Չորս տարիների եզրակացությունս մեկն է` ամեն գնով հարստանալու մոլուցքն ու բիզնես շահը կուրացրել և խլացրել է մեր իշխանություններին: Հայրենիքին որպես շինհրապարակ վերաբերվող մեր քաղաքական էլիտան չի վարանում հասարակության մի մասին գերակա շահի զոհ դարձնել ու եվրոպական դատարանների դռները մղել, մի մասին պարզապես արտագաղթի ճանապարհը ցույց տալ, մյուսների լույսն ու օդը փակել, դիմազրկել մայրաքաղաքն ու կենտրոնից վերացնել մի ամբողջ ճարտարապետամշակութային ժառանգություն:
Բայց ճապոնական վերջին աղետն ու նաև համառությունս թույլ չեն տալիս լռել, մանավանդ որ` ո´չ ճապոնական հասարակության խոհեմությունն ունենք, ո´չ նրանց կազմակերպվածությունը, ո´չ հանդուրժողականությունը, ո´չ էլ նրանց բարոյական, նյութական ու վարչական ռեսուրսները:
Թվում է, թե 88-ի երկրաշարժից դասեր պիտի քաղեինք: Իհարկե, սեյսմիկ շինարարության և անվտանգության հայեցակարգեր ու որոշումներ ընդունվեցին` ներառյալ 7-հարկայնության չգերազանցումը, սակայն սրանք մնացին թղթի վրա:
Մարդկային գործոնի` իրավիճակային, կետային բարձր խտության կառուցապատման արդյունքում մոտ մեկ միլիոն բնակչությամբ Երևանը վերածվել է նրա բնակիչների անվտանգությանը սպառնացող գոտու։
Ինչպես և Ճապոնիան, Երևանը գտնվում է նույն 100 տոկոսանոց սեյսմիկ գոտում: Սեյսմիկ առումով ամենաանբարենպաստը մայրաքաղաքի Կենտրոնն է, ուր շատ հաճախ կառուցապատումն իրականացվում է սեյսմիկ շինարարության նորմերի խախտումով, առանց երկրաբանական լուրջ հետազոտության, ինչը պատճառ է դառնալու շենքերի փլուզման:
Երկրաբանական քարտեզները 80թ.-ից մինչ այսօր չեն վերանայվել:
Երևանի բնակֆոնդի 70%-ը սեյսմակայուն չի, իսկ վթարային շենքերն ամրացնելու փոխարեն, թույլատրվում է նկուղները քանդել կամ հարկեր ավելացնել: Նույնիսկ 7-բալանոց երկրաշարժի դեպքում մի շարք դպրոցներ և 9-հարկանի շենքեր ենթակա են փլուզման:
Քաղաքաշինության նախարարության տեղեկանքի համաձայն` 2004-2007թթ. 4801 օբյեկտներում կատարած ստուգումների արդյունքում պարզվել է, որ 1658-ում շինաշխատանքներն իրականացվել են առանց որակի տեխնիկական հսկողության, իսկ օբյեկտների 54%-ում էլ որակի տեխհսկողություն են իրականացրել համապատասխան մասնագիտություն չունեցող անձինք: Երևանի կենտրոնի խաղահրապարակները, շենքամիջյա հնարավոր գրեթե բոլոր հողակտորները վերածվել են հակահրդեհային և ինսոլացիոն, քաղաքաշինական նորմերի խախտումով կառուցվող բարձրահարկերի շինհրապարակների: Նույնիսկ հակահրդեհային գոտիներ չեն թողնվել, որպեսզի փրկարարները կարողանան մոտենալ շենքերին£
Սեյսմիկ պաշտպանության օրենքով այդօրինակ վթարների պատասխանատվությունը կրում է օրենքով նախատեսված լիազոր մարմինը` սեյսմիկ պաշտպանության ծառայությունը, սակայն սեյսմիկ անվտանգության ապահովմանն ուղղված իրենց գործառույթները չեն իրականացվում կամ իրացվում:
Հայտարարությունս ոչ թե ահաբեկելու, այլ ահազանգելու խնդիր ունի: Իրավունք չունենք մատների արանքով նայել ազգային ֆիզիկական անվտանգության խնդրին: Աղետները կրկնվելու հաճախականություն ունեն, իսկ ավերակները թագավորելը` անիմաստ է:
