«Ի՞նչ արդարադատության մասին է խոսքը»,- «Առաջին լրատվական»-ի հետ զրույցում այս մասին ասաց օրերս Մոսկվայի «Դոմոդեդովո» օդանավակայանում ձերբակալված, ապա կալանավորված հայազգի հայտնի գործարար, բարերար Լևոն Հայրապետյանի պաշտպան Ռուբեն Մարգարյանը՝ պատասխանելով հարցին, թե այս փուլում ո՞րն է լինելու պաշտպանական կողմի գլխավոր խնդիրը:
Նա նշեց, որ պաշտպանական կողմն արդեն սկսել է պաշտպանությունը՝ կենտրոնանալով Լևոն Հայրապետյանի նկատմամբ կիրառված ապօրինի խափանման միջոցը՝ կալանքը, փոխելու վրա: Ըստ նրա՝ երեկ արդեն հայտարարություն են տվել այն մասին, որ Լևոն Հայրապետյանին պետք է համալիր բուժզննման ենթարկել՝ պարզելու համար, թե ինչ հիվանդություններով է տառապում Հայրապետյանը, որոնց առկայության պայմաններում նա չի կարող գտնվել մեկուսարանում՝ ըստ ՌԴ կառավարության թարմացված որոշման:
Պաշտպանն ասաց, որ գործընթացը կիրականացվի հնարավորինս կարճ ժամկետում: «Մենք պահանջել ենք, որպեսզի բժշկական նախարարական հանձնաժողովում ներգրավվի նաև Հայրապետյանին բուժող բժիշկը: Եթե հանձնաժողովը կազմվի այս եղանակով, և եզրակացություն կազմի, որ Հայրապետյանն այդ հիվանդություններով չի կարող մնալ կալանքի տակ, ապա նրան մեկուսարանից ազատ կարձակեն, այսինքն՝ խափանման միջոցը կփոխվի»,- ասաց փաստաբանը:
Ինչ վերաբերում է անհապաղ քննչական գործողություններին, ապա նա նշեց, որ դժվար է ինչ-որ բան ասել, քանի որ այսօր պաշտպանական կողմին տեղեկացրել են, որ հուլիսի 24-ին Հայրապետյանին պաշտոնապես մեղադրանք կառաջադրվի: «Երբ առաջադրեն, այն ժամանակ հասկանալի կդառնա, կտեսնենք, թե ինչ է գրված կախարդական կերպով»,- նկատեց հայազգի հեղինակավոր փաստաբանը:
Ռուբեն Մարգարյանը նաև նշեց, որ արդարադատությունից դժվար է խոսել, երբ տնտեսական հոդվածներով մեղադրվողի նկատմամբ որպես խափանման միջոց ընտրվում է կալանքը:
«Ինչ վերաբերում է հետաքննությանը, ապա այստեղ խոսել արդարադատության մասին՝ վաղ է, քանի որ հետաքննությունը արդարացի լինելու խնդիր չունի, հետաքննությունը հետաքննում է քրեական գործը: Համոզմունք ունեմ, որ Հայրապետյանին կալանքի տակ առնելու որոշումը ճիշտ չէր: Ես համաձայն չեմ այդ որոշման հետ, քանի որ գործի այն նյութերը, որոնք ներկայացվել են դատարանին, կալանք չէին ենթադրում, հիմք չկար այդ հանցագործությունում նրա մասնակցության վերաբերյալ:
Ես արդեն հոգնել եմ մեկնաբանել դատարանի գործողությունները, երբ դատարանը, չնայած միջնորդություններին, որպես խափանման միջոց կիրառում է կալանքը: Նույնիսկ բժշկական եզրակացությունների կամ այլ ապացույցների առկայության դեպքում, երբ որպես խափանման միջոց կարելի է կիրառել գրավը կամ տնային կալանքը, ցավոք՝ 99% դեպքերում Մոսկվայում դատարանը որպես խափանման միջոց ընտրում է կալանքը:
Սա միտում է, վիճակագրություն. Հայաստանում ևս այդպես է 94.9% դեպքերում: Ուստի այս պայմաններում խոսել արդարադատության մասին՝ հնարավոր չէ»,- ասաց նա:
Եզրափակելով՝ փաստաբանն անդրադարձավ նաև խոսակցություններին, թե Լևոն Հայրապետյանի հետ կատարվածը քաղաքական ենթատեքստ ունի՝ ասելով, որ ինքը քաղաքական ենթատեքստ չի տեսնում:
Հիշեցնենք, որ օրերս Ռուսաստանի Անվտանգության դաշնային ծառայության (ԱԴԾ) աշխատակիցները Մոսկվայի «Դոմոդեդովո» օդանավակայանում ձերբակալեցին Հայկական սփյուռքի ամենահարուստ ներկայացուցիչներից մեկին՝ Լևոն Հայրապետյանին, հայտնի «կինգիսեփյան» հանցավոր խմբավորման գործի բացահայտման շրջանակներում, որի հետևում կանգնած է ազդեցիկ ռուսական սենատորներից մեկը: Ներկա պահին Լևոն Հայրապետյանը մեղադրվում է մի քանի քրեական հոդվածներով՝ փողերի օրինականացում հանցավոր ճանապարհով, չարաշահումներ, փողերի լվացում: Ըստ պաշտոնական վարկածի՝ ռուսական սենատոր Իգոր Իզմեստևն է խոստովանել Հայրապետյանի հետ իր հանցավոր կապերի մասին:
