Նոյեմբերի 27-ին YouTube-ում տեսանյութ հայտնվեց այն մասին, թե ինչպես են սիրիացի ապստամբները «երկիր-օդ» հրթիռի միջոցով հարված հասցրել ռուսական արտադրության սիրիական ռազմական ուղղաթիռի, գրում է ամերիկյան Time պարբերականը:
Դրանից մեկ օր առաջ՝ նոյեմբերի 26-ին, Anonymous խմբի հաքերները հրապարակել էին Սիրիայի ԱԳՆ-ից գողացված փաստաթղթեր: Դրանցից մեկում մանրամասն խոսվում է Մոսկվայից Դամասկոս 240 տոննա նոր տպված սիրիական թղթադրամի փոխադրման մասին: Ռուսաստանը հրապարակավ հաստատել է, որ այդ գումարը Ասադի ռեժիմի համար է: Մեկ այլ փաստաթղթում էլ ներկայացվում էր վերանորոգված չորս ուղղաթիռների՝ Մոսկվայից Սիրիա թռիչքային պլանը:
Ըստ փաստաթղթի՝ բեռի այդ խմբաքանակի առաջին մատակարարումը կատարվել է նոյեմբերի 21-ին, իսկ երկրորդը՝ նոյեմբերի 28-ին, ևս երկուսը ծրագրված են դեկտեմբերի սկզբին: Ինչպես վկայում են փաստաթղթերը՝ ապրանքի դիմաց վճարումը կատարվել է կանխիկ, իսկ երթուղին անցել է Իրանի, Իրաքի և Ադրբեջանի օդային տարածքով, այն երկրների, որոնք էմբարգո են կիրառել Սիրիա զենքի մատակարարումների վրա:
Դրանից հետո ԵՄ-ն և Թուրքիան արգելեցին իրենց տարածքով բոլոր սիրիական օդանավերի թռիչքները: Հոկտեմբերին դա հանգեցրեց Անկարայի և Մոսկվայի միջև դիվանագիտական հակամարտության, քանի որ Թուրքիայի կործանիչները հարկադրաբար իջեցրին Մոսկվայից Դամասկոս թռչող սիրիական օդանավը: Թուրքական կողմի զգոնությունը ռուսներին ստիպեց ուղղաթիռների փոխադրման նոր երթուղի մշակել՝ գրում է Time-ը:
Եթե Իրանի դիրքորոշումն այս հարցում լիովին հասկանալի է, ապա Ադրբեջանի հակաարևմտյան դիրքորոշումը հարցեր է առաջացնում:
Contact.az-ն ավելացնում է, որ հղումն առ այն, թե Բաքուն կարող էր տեղյակ չլինել բեռների բնույթի մասին, քննության չի դիմանում:
