Արցախյան ազատամարտի մասնակից Վարդան Թումանյանին Ջունգլ մականունով Գևորգ Սարգսյանը, հոր՝ Բաբկեն Սարգսյանի և իր մերձավոր 2 բարեկամների հետ ծեծել է հենց շենքի բակում, Վարդանի կնոջ և դստեր ներկայությամբ: Կնոջ և դստեր ջանքերը՝ ազատելու Վարդանին նրանց ճանկերից, ապարդյուն են անցել: Ծեծելով, մահամերձության աստիճանի հասցնելուց հետո հանցավոր խումբը ինքնակամ լքել է տարածքը՝ կնոջը հորդորելով շնորհակալ լինել, որ դեռ ողջ են թողնում:
Վարդանի և Բաբկեն Սարգսյանի միջև վեճը ծագել է նարդու սեղանի շուրջ: Փոխադարձ ռեպլիկներից վիճաբանություն է սկսվել: Բաբկենը Վարդանին թուրք է անվանել, որն էլ թեժացրել է վեճը: Վարդանը, սակայն, Բաբկենին հորդորել է վերջ տալ: «Մեծ մարդ ես, վե՛րջ տուր»,- կնոջ պատմելով՝ ասել է Վարդանը: Բաբկենը, սակայն, բորբոքվել է, ձեռքով ցրիվ է տվել նարդու խաղաքարերը և ուզեցել խաղատախտակով հարվածել Վարդանին: Վարդանը հրել է, որի ժամանակ նա ընկել է: Թերևս վիրավորվելով դրանից՝ Բաբկենը տուն է գնացել, կատարվածը պատմել տղաներին, որոնք, ըստ շրջանառվող խոսակցությունների, «Էլլա» գիշերային ակումբի անվտանգության աշխատողներ են, վերադարձել են «հոր մուռը հանելու»:
«Եկան, հարցրին, թե Վարդանն ո՞վ է, ապա կանչեցին մի րոպեով պատի հետև»,- «Առաջին լրատվական»-ի հետ զրույցում պատմեց կինը՝ տիկին Տանյան: Նրա խոսքով՝ նրանք Վարդանից պահանջել են ներողություն խնդրել, որը նա չի արել: Ապա սկսվել է ծեծուջարդը: «Նրանք հարվածում էին Վարդանին: Ընկած վիճակում, երբ ամուսինս փորձում էր բարձրանալ, իրենք իրենց ավելի հարմար դիրքի համար ավելի էին բարձրացնում, խփում էին ու դեմքին, գլխին հարվածներ հասցնում: Հերթական հարվածից հետո նա ընկավ ասֆալտին, ու բերանից պրոթեզի կեսը թափվեց»,-պատմեց կինը:
Ծեծելուց հետո նրանք հանգիստ հեռացել են: Վարդանի հարազատները նրան տեղափոխել են հիվանդանոց, որտեղ նա երկար չի մնացել և փախել է տուն, որտեղ աստիճանաբար նրա վիճակը վատացել է: Հաջորդ օրը նորից տեղափոխել են հիվանդանոց, որտեղ գլխուղեղի վիրահատությունից հետո մի քանի ժամ անց մահացել է:
Այս գործով արդեն իսկ քրեական գործ կա հարուցված: Ջունգլը և իր բարեկամներից մեկը ձերբակալված են: Հորը՝ ստորագրությամբ՝ չհեռանալու պայմանով, ազատ են արձակել: Ծեծին մասնակցած երկուսը փախուստի մեջ են:
Վարդանի քրոջ՝ տիկին Մարիետայի խոսքով, եթե այս գործով արդարություն չլինի, և նրանք խմբակային հանցագործության համար 15 տարվա անազատության չդատապարտվեն, ինքը սեփական ձեռքերով արդարության կհասնի: «Այդ ժամանակ էս գործի ավարտը ես եմ անելու: Հայաստանում այդ ժամանակ կհայտնվի Մարիետա Թումանյանը, որը տեռոր է անելու»:
Չնայած որ հանցագործության հիմնական իրականացնողները ձերբակալված են, սակայն Վարդանի կինն ու երեխաները վախենում են նրանց ընտանիքից ու մերձավորներից: Ջունգլը անգամ Վարդանի կնոջ հետ առերեսման ժամանակ սպառնացել է, թե զգուշ եղիր, երեխաներ ունես, աղջիկներ ունես…
«Ջունգլին բոլորն են ճանաչում այս քաղաքում: Նրանք վարձու մարդասպաններ են: Բայց իրեն մեծացնողները, էդպես դուխ տվողները չեն պատկերացնում, որ մի օր Էդ կենդանին իրենց դեմ է դուրս գալու, իրենց երեխաների դեմ է անելու: Նրանք արյունոտ հացով սնված մարդիկ են»,- արցունքը կոկորդում ասաց տիկին Տանյան:
Առավել մանրամասն՝ տեսանյությում:
