Արկտիկայում սառույցների հալոցքը վերջին 20 տարիներին ուժեղացել է և այժմ տեղի է ունենում եռակի արագ, քան 1990-ականներին: Նման եզրակացություն է պարունակվում զեկույցում, որը պատրաստել է տարբեր երկրների 26 գիտական լաբորատորիաների գիտնականների խումբը՝ օգտագործելով ՆԱՍԱ-ի և Եվրոպական տիեզերական գործակալության արբանյակների տվյալները:
Հետազոտությունը հրապարակած Science ամսագիրը նշում է, որ այդ տվյալները ներկայում արկտիկական տարաշածրջանի սառցածածկույթի վիճակի ամենաճշգրիտ գնահատականն են:
Արկտիկայում և դանիական Գրենլանդիա կղզում սառույցների հալչելու պատճառով համաշխարհային օվկիանոսի մակարդակը 1992 թվականից բարձրացել է 11.1 միլիմետրով: Ընդհանուր առմամբ՝ վերջին երկու տասնամյակում այն բարձրացել է մոտ 0.5 սմ-ով:
Այլ պատճառներ են համաշխարհային օվկիանոսի ջրերի տաքացումը, լեռնասառցադաշտերի հալոցքը, ինչպես նաև օգտակար հանածոների արդյունահանման հետևանքով գրունտային ջրերի մակարդակի փոփոխումը: Զեկույցի հեղինակները հատուկ անհանգստություն են արտահայտել Գրենլանդիայի սառցածածկույթի կրճատման առնչությամբ, որը ներկայում տեղի է ունենում 5 անգամ ավելի արագ, քան 20 տարի առաջ:
Գիտնականները վաղուց են նախազգուշացնում այն մասին, որ արկտիկական սառույցները մի օր կարող են լիովին վերանալ՝ սպառնալով լուրջ հետևանքներով:
