Կենտրոն և Նորք-Մարաշ վարչական շրջանների ընդհանուր իրավասության դատարանում Արշակ Վարդանյանի նախագահությամբ ավարտվեց Մուշեղ Կ.-ի և Կարեն Կ.-ի գործի դատական քննությունը:
Ժամկետային զինվորական ծառայության մեջ գտնվող այս երիտասարդները, ըստ մեղադրանքի, ինքնակամ թողել են զորամասը, Երևան քաղաքի «Կիրովի» այգու մուտքի մոտ հանդիպել կանացի հագուստներ կրող համասեռամոլ Մերուժան Դ.-ին և, համոզված լինելով, որ նա կին մարմնավաճառ է, վերջինիս հետ նույն այգում սեռական հարաբերություններ ունենալու դիմաց պայմանավորվել ու վճարել են 19 հազար դրամ:
Սակայն երիտասարդները «մարմնավաճառուհու» ձայնից շուտով հասկացել են, որ նա տղամարդ է, և հետ են պահանջել իրենց գումարը:
«Մարմնավաճառուհին» չի համաձայնել գումարը վերադարձնել, ավելին, սեռական հայհոյանք է տվել:
Զինծառայողները վիրավորվել են ու հարվածներ հասցրել «մարմնավաճառուհուն»: Իսկ երբ նա ասել է, թե գումարը իր գրպանում է, կարող են վերցնել, նրանք այդ գրպանում ոչինչ չեն գտել ու վերցրել են այնտեղ եղած բջջային հեռախոսը:
«Մարմնավաճառուհու» բարձրացրած աղմուկին ականջալուր են եղել այգու մոտակայքում գտնվող մյուս «մարմնավաճառուհիները» և հարայհրոցով մոտեցել են անմխիթար վիճակի մեջ հայտնված զինծառայողներին:
Վերջիններս այդ «զորագնդի» դեմ պայքարել չցանկանալով՝ «նահանջել են»՝ հանգամանքների բերումով իրենց հետ տանելով նաև «մարմնավաճառուհու» հեռախոսը:
Հետագայում «մարմնավաճառուհին» բողոքել է, պարզվել է, որ զինծառայողները նրա առողջությանը պատճառել են թեթև վնաս: Բջջային հեռախոսի արժեքը եղել է 9 հազար դրամ: Այն հայտնաբերվել ու առգրավվել է:
Ամբաստանյալ երիտասարդներին մեղադրանք է առաջադրվել բռնություն գործադրելով կամ դրա սպառնալիքով ինքնիրավչության համար՝ ՀՀ քրեական օրենսգրքի 322 հոդվածի 2-րդ մասով:
Ընդհանուր իրավասության դատարանում տուժողը հայտնել է, թե բողոք չունի, ամբաստանյալների հետ հաշտվել է:
Տուժողի հետ հաշտվելու մասին են հայտարարել նաև ամբաստանյալները, ովքեր հայտնել են, թե իրենք սեռական շեղվածություն չունեն, այդ պատճառով կտրականապես չեն ցանկացել, որ տղամարդ մարմնավաճառը իրենց սեռական ծառայություններ մատուցի:
Նրան մոտեցել են սխալմամբ, չեն տարբերել, որ տղամարդ է մարմնավաճառը, նա եղել է կնոջ հագուստով, արդուզարդով ու հարդարանքով: Իրենք չեն իմացել, որ այդ այգու մոտ կանգնում են սեռական շեղվածություն ունեցողները:
Այսօր դատական վիճաբանությունների փուլն էր: Մեղադրողը հաստատված գնահատեց ամբաստանյալների մեղքը և միջնորդեց, որ նրանք դատապարտվեն 400 հազար դրամական տուգանքի:
Պաշտպանական կողմը իր ճառում հիմնավորեց, որ տղաների կատարածի մեջ բացակայում են ինքնիրավչության հանցակազմի առնվազն երկու հատկանիշները:
Ամբաստանյալներն իրենց գումարը հետ են պահանջել ու չեն ցանկացել, որ տուժողը իրենց սեռական ծառայություն մատուցի: Վերջինս հրաժարվել է գումարը վերադարձնել՝ պատճառաբանելով, թե կորցրել է իր հինգ րոպե ժամանակը, որը կարող է գնահատվել հենց տասնինը հազար դրամ:
Տուժողը չի ցանկացել վերադարձնել գումարը՝ չկայացած հաճախորդների վրա բարկությունից:
Բայց ամբաստանյալներն էլ գումարը վճարել էին ոչ թե «մարմնավաճառուհու» հետ հինգ րոպե զրուցելու, այլ ուրիշ ծառայության համար, դրա համար նրանք էլ արդարացի են համարել, որ իրենց գումարը ենթակա է վերադարձման
Պաշտպանական կողմը վիճարկեց նաև տուժողին էական վնաս հասցնելու հանգամանքը: Տուժողի մոտ է մնացել ամբաստանյալների 19 հազար դրամը: Տուժողի հեռախոսը, որ ամբաստանյալների մոտ է մնացել խուճապի մատնվելու արդյունքում, 9 հազար դրամ արժեք է ունեցել:
«Հաշվանցի դեպքում տուժողն ամբաստանյալներին պարտք է մնացել 10 հազար դրամ: Դեռ հարց է, թե ով ում նկատմամբ է ինքնիրավչություն կատարել»,- ասաց պաշտպանը:
Ըստ պաշտպանական կողմի՝ ամբաստանյալների արարքին տրվել է սխալ քրեաիրավական գնահատական, ինքնիրավչության հանցակազմը նրանց արարքում բացակայում է:
Նրանք նաև տուժողին վնաս պատճառելու դիտավորություն չեն ունեցել:
Ամբաստանյալները զինծառայող են, երիտասարդ, բազմաթիվ շնորհակալագրեր են ստացել:
Պաշտպանական կողմը միջնորդեց ամբաստանյալներին ճանաչել անպարտ և արդարացնել:
Պաշտպանը հիշատակեց նաև, որ այսօր Արդարադատության միջազգային օրն է, բոլորին շնորհավորեց այդ կապակցությամբ ու մաղթեց, որ արդարադատությունը հաղթանակ տանի այս գործով:
Մեղադրողը հանդես եկավ ռեպլիկով և պնդեց, որ ամբաստանյալների կատարածը եղել է ինքնիրավչություն:
Եվ տուժողին էական վնաս է հասցվել՝ ոչ թե նկատի առնելով նրա հեռախոսը ամբաստանյալների կողմից վերցվելու հանգամանքը, այլ այն, որ «ոտնձգություն է կատարվել մարդու իրավունքների և ազատությունների նկատմամբ»:
Նախագահողը ճշտեց՝ մարդու ֆիզիկական անձեռնմխելիության մասի՞ն էր ասում մեղադրողը, բայց մեղադրողը դա չհաստատեց: Ըստ ամենայնի, նկատի էին առնվում հենց մարդու իրավունքներն ու ազատությունները, այդ թվում՝ սեռական կողմնորոշման ազատությունը:
Տուժողը մեկ անգամ ևս պնդեց, որ ամբաստանյալների դեմ բողոք չունի:
Նախագահողը մտավ խորհրդակցական սենյակ, քիչ անց դուրս եկավ ու հրապարակեց դատավճիռը:
Մուշեղն ու Կարենը մեղավոր ճանաչվեցին ինքնիրավչության համար՝ հենց մեղսագրված հոդվածով՝ ՀՀ քրեական օրենսգրքի 322 հոդվածի 2-րդ մասով, և դատապարտվեցին 500 հազարական դրամ տուգանքի:
Ամբաստանյալներից համապարտության կարգով որպես դատական ծախս կբռնագանձվի 24 հազար 800 դրամ:
Փաստորեն, Արդարադատության միջազգային օրը դատարանն ավելի խիստ պատիժ սահմանեց, քան միջնորդել էր մեղադրողը…