Երևանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանն այսօր` հուլիսի 17 –ին հրապարակեց ազատամարտիկ, պահեստազորի գնդապետ Վոլոդյա Ավետիսյանի գործով դատավճիռը: Ավետիսյանին ծափերով և «Ազատություն» կոչով դիմավորեցին դահլիճում: Ամբաստանյալ Վոլոդյա Ավետիսյանին, ըստ օրենքի, վերջին խոսքի հնարավորություն տրվեց, որ դարձյալ ուղեկցվեց ծափահարություններով: «Հարգելի մարտական ընկերներ, հայ ժողովուրդ, հարգելի անարդարադատություն, մեր երկրում հետաքրքիրն ինչ ա` որ քննիչը գալիս ա, առաջարկում ա, որ խոստանան` դուրս գան, չպայքարեն, դուրս են գալիս, երբ որ ասում են` չէ, դուրս գամ, պայքարելու եմ, ուրեմն պիտի նստեն: Խնդիր չկա, կնստեմ: Արդեն ինն ամիս ա, նստած եմ, գիտեք` ինչ ա կատարվում: Ես մեղավոր չեմ, որ ստեղ եմ, սա ա մեղավոր` ռեժիմը, համակարգն ա մեղավոր, որ ես ստեղ եմ հայտնվել, բան չունեմ ասելու ընդհանուր, կոչ եմ անում համայն հայությանը` գալ, մեր Հայաստան պետությանը տեր կանգնել»,- ասաց նա:
Ավետիսյանը նշեց` քաջ հասկանում է` կորուստներ ենք ունեցել, ապա հիշեցրեց` այսպես որ գնաց, սա էլ ենք կորցնելու, իսկ դա ասելով չի, տեսնելով է, զգալով: Ազատամարտիկն ասաց, թե մայրական կողմը Նախիջևանում է ծնվել, բայց դավաճան հայերը, «փողազգիները» այն տվեցին թշնամուն: «Թուրքահպատակ իշխանություններ են սրանք: Հայաստանն` առանց հայերի. էսքանով երևի ամեն ինչ ասված ա, ներողություն եմ խնդրում իմ մարտական ընկերներից, ընտանիքից, բայց մեր ապագայի համար ես պայքարելու եմ, ինչ ուզում են, թող անեն»,- ասաց նա:
Ազատամարտիկի խոսքին արձագանքեցին ընկերները` «փառք հերոսներին, մահ դավաճաններին» , «հլը էս մարդու տունն էլ նայեք, իրանց դղյակներն էլ նայեք` կաշառքներով դզած» , «դուխդ տեղը» , «հերոս» բացականչություններով:
Նշենք, որ պահեստազորի գնդապետը մեղադրվում է խարդախություն կատարելու մեջ։ Մեղադրող Վարդան Պապիկյանը միջնորդել էր նրան ազատազրկման դատապարտել 6 տարի եւ 6 ամիս ժամկետով։