Աղմուկ հանած Ժամանակակից հայոց պատմության նոր դասագրքի հեղինակ, ԵՊՀ պատմության ֆակուլտետի դեկան Էդիկ Մինասյանը ԱԺ դաշնակցական պատգամավոր Արծվիկ Մինասյանի հարազատ եղբայրն է: Արծվիկ Մինասյանը նաև ԱԺ պետաիրավական հարցերի հանձնաժողովի անդամ է ու երեկ մասնակցում էր Մարտի 1-ի հարցով ԱԺ-ում նոր հանձնաժողով ստեղծելու առթիվ ՀԱԿ նախագծի քննարկմանը: Մեզ հետ զրույցում Արծվիկ Մինասյանն ասաց, որ Մարտի 1-ի հարցով հանձնաժողով ստեղծելու վերաբերյալ իր դիրքորոշումը դրական է: «Առաջին լրատվական»-ը երեկ զրուցեց դաշնակցական պատգամավորի հետ:
– Պարոն Մինասյան, Դուք ասում եք, որ կողմ եք Մարտի 1-ի հարցով հանձնաժողովի ստեղծմանը, այդ դեպքում ինչպե՞ս հասկանանք Ձեր եղբոր հեղինակած գիրքը: Դուք կիսո՞ւմ եք նրա տեսակետը:
– Նախ ասեմ, որ դա իմ եղբոր գիրքը չի: Դա համալսարանի պատմության ֆակուլտետում բուհական դասագիրք է, որն ունի կոլեկտիվ, և որն ունի կոլեկտիվ և խմբագրական կազմ: Իմ եղբայրը կոլեկտիվի անդամներից մեկն է:
– Բայց գրքի հեղինակը Ձեր եղբայրն է, չէ՞:
– Ո՛չ, գիրքը կոլեկտիվ հեղինակություն է, անհատական հեղինակություն չի: Երկրորդ` ես զարմանում եմ, որ մամուլի միջոցները, առանց ամբողջական տեքստին ծանոթանալու, հիմնվելով ակնհայտ սադրանք կիրառող ակցիայի վրա, առանձին հատվածներ են ներկայացնում այդ բաժնից և դրա վրա փորձում են տեսակետ կառուցել: Սա անթույլատրելի է:
– Ասել է թե` կարծում եք, այդ հատվածները Մարտի 1-ի մասին ճի՞շտ են:
– Որպեսզի ամբողջական տեսակետ կազմվի, առնվազն անհրաժեշտ է մարտի 1-2-ի վերաբերյալ ամբողջ հատվածը հրապարակվի, որտեղ դուք կգտնեք նաև մեղադրանք ներկայացված իշխանություններին և ընդհանուր բարոյահոգեբանական միջավայրին Հայաստանի, մարտի 1-2-ի բացասական ազդեցությանը մեր երկրի վրա:
– Չե՞ք կարծում, որ պատմության դասագրքում պետք է ոչ թե մեղադրանք ներկայացվեր իշխանությանը կամ ընդդիմությանը, այլ պետք է պատմվեր իրականությունը համակողմանի:
– Որևէ միակողմանի բան չկա: Ամբողջական տեքստը պետք է նայել, նոր գնահատական տալ: Երկրորդ` ակնհայտորեն կա աղբյուր, և այդ աղբյուրը ԱԺ ժամանակավոր հանձնաժողովի եզրակացությունն է, որը լսվել է ԱԺ-ում ի գիտություն, և որն այս պահի դրությամբ միակ հասարակական, պաշտոնական տեղեկատվությունն է: Կա մասնագիտական վեճ, որը պահանջում է մասնագիտական քննարկում, այլ ոչ թե այս կամ այն զազրախոսություններ կամ վիրավորանքներ, կամ հայհոյանքներ: Եվ ես հիմա նաև ձեր թերթի միջոցով դիմում եմ բոլոր այն անձանց, ովքեր կփորձեն անձնական վիրավորանքներ հասցնել, առաջին հերթին պատասխան կտան օրենքի առաջ և կստանան դրան համարժեք պատասխաններ:
– Այսինքն` սպառնո՞ւմ եք ակցիայի մասնակիցներին:
– Ես ակցիայի մասնակիցներին չեմ սպառնում, ես սպառնում եմ բոլոր այն անձանց, ովքեր կփորձեն հայհոյանքներով խոսել իմ ընտանիքի հասցեին:
– Նման դեպք կա՞:
– Նման դեպք կա, և նախկին պատգամավոր, որն իրեն իրավունք է վերապահում իր ընտանիքում օգտագործվող և բնորոշ հասկացությունները փորձել տեղափոխել իմ եղբոր վրա:
– Իսկ Ձեր կարծիքով` դասագրքում, որը հեղինակել է Ձեր եղբայրը, վիրավորանք չկա՞ Մարտի 1-ի մասնակիցների, զոհերի և այլնի հանդեպ:
– Իմ կարծիքով` չկա նման որևէ վիրավորանք, հատկապես զոհերի հարազատների կամ զոհերի հասցեին: Եթե դուք կարդաք, այնտեղ շատ ավելի խորքային բաներ կան, որոնք ցույց են տալիս մեր հասարակության մեջ այն բացասական պահերը, որոնք կարիք ունեն համազգային ներուժի համախմբմամբ հաղթահարման: Եվ այսօր օգտագործել զոհերի հարազատներին` նման տրամադրություն ձևավորելու, առնվազն անբարոյականություն է:
– Զոհերի հարազատներն արդեն իսկ հայտարարել են, որ դիմելու են դատարան` պատասխանատվության ենթարկելու Ձեր եղբորը:
– Ես ողջունում եմ քաղաքացիական այդ քայլը: Պատասխանատվության ենթարկելը կորոշի դատարանը: Այն, ինչ իրենք հայտարարում են, որ բողոքարկելու են կամ ներկայացնելու են դիմումներ, ես կարծում եմ, որ դա քաղաքացիական գիտակցության արգասիք է, ինչը դրական եմ գնահատում: …Գիտնական մարդուն բերել, ներքաշել քաղաքական խաղերի մեջ, էն էլ կեղտոտ ձևով, առնվազն դեգրադացնում է հասարակությանը վերջնականապես:
– Իսկ չե՞ք կարծում, որ ինքն է իրեն ներքաշել նման խաղի մեջ:
– Ո՛չ, ես կարծում եմ, որ դա անում են լրագրողները, որոնք որ առանց խորամուխ լինելու հարցի մեջ, նախապես ինչ-որ հրապարակումներ են կատարում:
– Այսինքն` գտնում եք, որ Ձեր եղբայրն ամեն ինչ ճիշտ է արել և քննադատության ենթակա չէ՞:
– Ես` որպես քաղաքական գործին մասնակցող մարդ, միգուցե շատ տեսակետներ լսելով հանդերձ` ես էլ համաձայնեմ, բայց դրա ձևը և կարգը կա: Այդ ձևն ու կարգը պահանջում է մասնագիտական քննարկում:
– Չե՞ք կարծում, որ Ձեր նշած մասնագիտական քննարկումը, եթե Ձեր եղբայրն իրոք օբյեկտիվ էր, մինչ դասագրքի ի հայտ գալը պետք է լիներ: Դասագիրքն արդեն վերջնական տարբերակ է:
– Ցանկացած ժամանակ ժամանակակից պատմությունը միշտ էլ տարբեր տեսակետների, բախումների անհրաժեշտություն է առաջացնում: Կարդացեք բաժինն ամբողջությամբ և նոր կարծիք կազմեք:
– Դուք ամբողջությամբ կարդացե՞լ եք դասագիրքը:
– Ես ոչ միայն կարդացել եմ, այլև նվիրել եմ մի քանի լրագրողների:
