Ամերիկյան Associated Press գործակալության փոխանցմամբ՝ անհայտ անձինք հարձակում են գործել Բեռլինում գտնվող Իրանի դեսպանատան վրա: Մոտ 30 մարդ ներխուժել է Բեռլինում Իրանի դեսպանատան տարածք: Նրանցից 10-ը ձերբակալվել են:
Գերմանական ոստիկանության տվյալներով՝ անհայտ անձինք երեկ ներթափանցել են դեսպանատան տարածք և դեսպանատան շենքի վրա են նետել քարեր և ներկեր, ինչպես նաև պատռել են Իրանի դրոշը: Ձերբակալվածների ինքնությունը չի հրապարակվում:
Գերմանիայի արտգործնախարար Գիդո Վեստերվելեն այս կապակցությամբ հեռախոսազրույց է ունեցել Իրանի արտգործնախարար Ալի Աքբար Սալեհիի հետ և ափսոսանք հայտնել տեղի ունեցածի համար: Վեստերվելեն խոստացել է անել ամեն հնարավոր բան՝ ապահովելու համար Գերմանիայում իրանական դիվանագիտական առաքելության անվտանգությունը:
