2001-ից ՄԻԱՎ վարակի մակարդակն Աֆրիկյան երկրներում 3 անգամ կրճատվել է: Ուկրաինայում այդպիսի անկում չի կանխատեսվում: Այս մասին հաղորդվում է ՄԻԱՎ/ ՁԻԱՀ-ի հարցով ՄԱԿ-ի միացյալ ծրագրի (Joint United Nations Programme on HIV/AIDS) հայտարարության մեջ:
Ծրագրի տեղեկության համաձայն` վերջին տարիներին աշխարհի 25 երկրներում 50%-ով կրճատվել է ՁԻԱՀ-ով վարակվելու դեպքերի, 25%-ով` հիվանդությունից մահացությունների թիվը, հայտնում է «Կոմենտարիի»-ն:
«Աշխարհում ՄԻԱՎ-ով վարակվելու դեպքերի ամենաբարձր մակարդակն ունեցող երկրներում ՄԻԱՎ-ով վարակվելու դեպքերը, 2001-ից սկսած, կտրուկ նվազել են` Մալավիում 73%-ով, Բոտսվանայում 71%-ով, Նամիբիայում 68%-ով, Զամբիայում 58%-ով, Զիմբաբվեում 50% ով, Հարվային Աֆրիկայում 41%-ով»,- հայտնում են փաստաթղթում:
Ուկրաինայում ՁԻԱՀ-ի հետ կապված իրավիճակը վերջին 20 տարիներին տագնապալի է: «Ուկրաինայում հիվանդությունը մնում է ամենատարածվածը Եվրոպայում: 2012-ի հունվարի 1-ի դրությամբ երկրում պաշտոնապես արձանագրվել է ավելի քան 204 000 ՄԻԱՎ-ով վարակման դեպք, նրանցից 50 000-ից ավելին հիվանդ է ՁԻԱՀ-ով»,- պատմել է Ուկրաինայում ՄԱԿ-ի միացյալ ծրագրի ներկայացուցիչ Նուզհաթ Էսանը:
Նրա խոսքով` ուկրաինացի երիտասարդներն ավելի հաճախ են վարակվում հիվանդության կանխարգելման տարրական կանոնները չպահպանելու պատճառով: Նրա կարծիքով` պատճառն ուկրաինացի երիտասարդների` հիվանդությունից բավարար տեղեկացված չլինելն է:
ՄԱԿ-ի միացյալ ծրագրի ծրագրային հարցերով խորհրդատու Անդրեյ Պոշտարուկի խոոսքով` ՁԻԱՀ-ով վարակվելու դեպքերի նվազելու պատճառն այն է, որ այդպիսի ծրագրերը լավ են ֆինանսավորվում:
«ՁԻԱՀ-ով հիվանդանալու դեպքերի կրճատվելն աֆրիկյան երկրներում կապված է շատ գործոնների, մասնավորապես` բնակչության վարքի փոփոխության հետ»,- նշել է նա:
