Մեծ Բրիտանիայում Էկվադորի դեսպան Անա Ալբանը հայտարարել է, որ Էկվադորի դեսպանատանը բնակվող WikiLeaks-ի հիմնադիր Ջուլիան Ասանժի մոտ զարգացել է խրոնիկ թոքային ինֆեկցիա և նա բժշկական մշտական հսկողության կարիք ունի:
Ինչպես հաղորդում է Associated Press գործակալությունը, Էկվադորը պատրաստ է վճարել Ասանժի բժշկական ծախսերը և շարունակում է պահանջել, որպեսզի նրան թողնեն հեռանալ Մեծ Բրիտանիայից, սակայն բրիտանական իշխանությունները մերժում են:
Հիշեցնենք, որ Էկվադորը քաղաքական ապաստան է տրամադրել Ասանժին 2012 թ. օգոստոսի 15-ին: Այնուամենայնիվ, նա չի կարողանում լքել Լոնդոնում Էկվադորի դեսպանատան տարածքը, քանի որ Մեծ Բրիտանիայի դատարանը որոշում է կայացրել WikiLeaks-ի հիմնադրին Շվեդիա արտահանձնելու մասին, որտեղ նրան մեղադրում են սեռական բնույթի հանցագործությունների մեջ:
Լրագրողի պաշտպանությունը պնդում է, որ նրա դեմ ուղղված մեղադրանքները քաղաքական ենթատեքստ ունեն և կապված են ԱՄՆ-ի դիվանագետների նամակագրության հրապարակման հետ: Ենթադրվում է, որ Շվեդիան Ասանժին կհանձնի ԱՄՆ-ին, որտեղ նրան կարող է սպառնալ մահապատիժ:
