Գվատեմալայի նախագահ Ալվարո Կոլոմի կինը` Սանդրա Տորեսը հայտարարել է, որ բաժանվում է ամուսնուց առաջիկա նախագահական ընտրություններին մասնակցելու համար: Այս մասին հաղորդում է Reuters գործակալությունը: Առաջին տիկինը որոշում է կայացրել նախագահական ընտրությունների ժամանակ առաջադրվել որպես նախագահի թեկնածու իշխող «Հույսի ազգային միության» կողմից, որը գլխավորում է նրա ամուսինը:
Երբ նախագահի կինը հայտարարել էր առաջադրվելու մասին, ընդդիմությունը առարկել էր, որ դրանով խախտվում է Սահմանադրության 186-րդ հոդվածը, որով նախագահական ընտրությունների ժամանակ իրավունք չունեն առաջադրվելու գործող նախագահի բարեկամները, այդ թվում` կինը և երեխաները: Հիմա Սանդրա Տորեսը որոշել է բաժնվել ամուսնուց, որպեսզի կարողանա մասնակցել ընտրություններին: Ընդդիմությունը հայտարարում է, որ ամեն դեպքում այդպիսի զարգացում թույլ չի տալու:
