Արարատի մարզում ձկնաբուծարաններն իսկական պատուհաս են դարձել. մի կողմից կերակրում են, մյուս կողմից՝ ծարավի մատնում: Հանրապետության 320 ձկնաբուծարանների գրեթե 90 %-ն այս մարզում է արտեզյան ավազանի հաշվին: Սակայն ժամանակի ընթացքում ջրի անխնա օգտագործման պատճառով խորքային պաշարներն սկսում են սպառվել: Ժամանակին հորատանցքերից ջուրը շատրվանում էր, հիմա ջրին հասնելու համար ավելի ու ավելի խորն են փորում:
2013-ին արդեն նախորդ կառավարությունը որոշեց Արմավիրի և Արարատի մարզերի ձկնաբուծական տնտեսություններում կոնսերվացնել ապօրինի շահագործվող և ինքնաշատրվանող 43 հոր: Պահուստային ֆոնդից հատկացրեց շուրջ 107,5 մլն դրամ: 43 փակված հորերի փոխարեն, սակայն, նոր կառավարությունն այս տարի որոշեց նորերը բացել՝ գրեթե կրկնապատկելով հորերի թիվն ու հնգապատկելով գումարը:
70 նոր խորքային հորեր փորելու համար և փակված 42 հորատանցքերը կրկին բացելու համար կառավարությունը հատկացրեց 550 մլն դրամ: Պատճառաբանւթյունը ոռոգման շրջանում գյուղացուն ջուր հասցնելն է, իրականում սակայն նպատակը մեկն է՝ ձկնաբուծարանների տերերին ջուր հասցնելը՝ Հովիկ Աբրահամյան, Գագիկ Ծառուկյան, Սամվել Ալեքսանյան. նրանցից ոչ մեկին չի հետաքրքրում Արարատյան դաշտի հետագա ճակատագիրը, կարևորը բիզնես շահն է:
Բնապահպան Լևոն Գալստյանը նկատում է. «2013-ի հետազոտությունների արդյունքում պարզվեց, որ մոտ 2 անգամ գերազանցվել է թույլատրելի քանակը, որ իրավունք ունենինք վերցնելու հիմնականում ձկնարդյունաբերության զարգացման համար. ավազանի մակերեսը 3 անգամ նվազել է, ջրի հորիզոնը 15-20 մ իջել է, ջրատվությունը նվազել է 3-6 անգամ»:
Արտեզյան ջրավազանն իր ջրային պաշարներով Հայաստանում երկրորդն է` Սևանից հետո: Տարեկան թույլատրելի է 1.1 մլրդ խ.մ ջրի սպառում, մինչդեռ վերցվում է մինչև 1,7 մլրդ խ.մ: Այս չարաշահումների հետևում պաշտոնյաների ու օլիգարխների անուններ են: Օրենքներն ու որոշումները հարմարեցվում են նրանց գրպանին: Ու թեև մասնագիտական ոսւումնասիրությունները տարիների ընթացքում բերեցին մի ճշմարտության, թե հորերի ու հորատանցքերի թիվը պետք է սահմանափակվի, ջրառը հսկվի ջրաչափերով, բայց նոր որոշումն արդեն ընդունված է, ու նոր հորեր կբացվեն: Իսկ թե ինչ մասնագիտական վերլուծության կամ ուսումնասիրության հիման վրա է կայացվել այս որոշումը՝ Հայաստանի լավագույն մասնագետները տեղյակ չեն. իրենց կարծիքը ոչ ոք չի հարցրել:
