Այսօր՝ նոյեմբերի 28-ին, տեղի է ունեցել ՀՀԿ գործադիր մարմնի հերթական նիստը: Այն վարել է ՀՀԿ առաջնորդ, Հայաստանի նախագահ Սերժ Սարգսյանը: Նիստին ներկա են եղել նաև ՀՀ Ազգային Ժողովի նախագահ Հովիկ Աբրահամյանը և ՀՀ վարչապետ Տիգրան Սարգսյանը:
Նիստից հետո Ազգային Ժողովի փոխնախագահ, ՀՀԿ մամուլի խոսնակ Էդուարդ Շարմազանովը լրագրողների հետ զրույցում նշել է, որ նիստում քննարկվել են ներքին և արտաքին քաղաքականությանն առնչվող հարցեր:
Անդրադառնալով ընտրություններում ընդդիմության միասնական թեկնածուի հարցին` Էդուարդ Շարմազանովը պատասխանել է, որ լուրջ չի վերաբերվում այդ խոսակցություններին:
Ըստ Շարմազանովի Սերժ Սարգսյանը մնում է ֆավորիտ թեկնածուն և պայքարը գնալու է երկրորդ տեղի համար: Շարմազանովի կարծիքով, «աջերն ու ձախերը» չեն կարող լեզու գտնել իրար հետ:
Նա նաև նշել է, որ նույնիսկ ԲՀԿ առաջնորդ Գագիկ Ծառուկյանի առաջադրման դեպքում էլ Սերժ Սարգսյանը կհաղթի:
