Արաբ գործարարները սկսել են ավելի հաճախ այցելել այն երկրներ, որտեղ ապաստան են գտել սիրիացի փախստականները: Ժամանելով բարեգործի կերպարանքով՝ նրանք հեռանում են մանկահասակ հարսնացուների հետ, որոնց ձեռք են բերում 1000-ից 2000 եվրոյով, գրում է The Washington Post-ը:
Այս գումարը հարստություն է Թուրքիա, Հորդանան, Լիբանան և Իրաք փախած սիրիացի ընտանիքների համար, իսկ մանկահասակ աղջիկները կարող են դառնալ շահագործման զոհ:
Շատ ընտանիքներ համաձայնում են տալ իրենց դուստրերին ընդամենը 1000 եվրո օժիտի դիմաց: Արաբական երկրների նավթային մագնատների համար դա ծիծաղելի գումար է:
Այս բիզնեսի բարգավաճմանը նպաստում են նաև տեղի մարդասիրական կազմակերպությունները: Փախստականների ճամբարում գործող մարդասիրական կազմակերպության ներկայացուցիչներից մեկի խոսքերով՝ դա շահագործում չէ, այլ մեծահոգություն:
Իրավապաշտպան կազմակերպությունները անհանգստացած են, որ նման ամուսնություններից հետո սիրիացի աղջիկներին ավելի վատ ճակատագիր է սպասվում, քան հիմա:
Հորդանանում սիրիացի փախստականների հարցով ՄԱԿ-ի գերագույն հանձնակատարի վարչության ներկայացուցիչ Էնդրյու Հարփերը թերթին տված հարցազրույցում հայտարարել է, որ մասնավորապես խոցելի են Հորդանանում գտնվող սիրիացի փախստականները: Նրա խոսքերով՝ վերջին ժամանակներս անպաշտպան բնակչության շահագործման ավելի շատ դեպքեր են գրանցվում:
«Մեծ է հավանականությունը, որ այդ աղջիկները կներքաշվեն մարմնավաճառության մեջ կամ ամուսնությունից որոշ ժամանակ հետո «դուրս կնետվեն» փողոց»,- նշել է նա:
