Բանգլադեշի ոստիկանությունը մայրաքաղաք Դաքայի արվարձանի կարի ֆաբրիկայի 3 աշխատակցի է ձերբակալել: Օրերս նույն ֆաբրիկայում բռնկված հրդեհը ավելի քան 120 մարդու մահվան պատճառ էր դարձել: Այս մասին տեղեկացնում է AFP գործակալությունը:
«Բոլոր երեքը Tazreen ֆաբրիկայի միջին օղակի մենեջերներ են: Միջադեպը վերապրածները պատմել են, որ նրանք թույլ չեն տվել աշխատողներին լքել շենքը՝ հրդեհի ազդանշանը բացատրելով սովորական վարժանքներով: Ենթադրաբար, նրանք նույնիսկ փակել էին դռները»,- պատմել է Դաքայի ոստիկանապետ Հաբիբուր Ռահմանը:
Հրդեհը բռնկվել էր անցած հանգստյան օրերին Դաքայի Աշուլիա արդյունաբերական շրջանում գտնվող կարի ֆաբրիկայի 9 հարկանի շենքում: Կրակն արագորեն տարածվել էր ողջ շենքով մեկ: Մարդիկ ստիպված էին եղել դուրս թռչել պատուհաններից: Հրշեջներից 5 ժամ է պահանջվել կրակը լիովին մարելու համար: Ինչպես տեղեկացնում է գործակալությունը, ֆաբրիկայում կարել են հագուստ արևմտյան խոշոր բրենդների, մասնավորապես` C&A-ի և Walmart-ի պատվերով:
