ԵՄ-ն գլխավոր դեր է խաղում Վրաստանի կայունության և անվտանգության հարցում: «Գրուզիա Օնլայն»-ի տեղեկացմամբ՝ այս հայտարարությունն այսօր Բաթումում տեղի ունեցած «Վրաստանի եվրոպական ուղին» 11-րդ միջազգային կոնֆերանսի ընթացքում ելույթի ժամանակ արել է Վրաստանի վարչապետ Իրակլի Ղարիբաշվիլին:
«Մենք հույս ունենք, որ տարածաշրջանում խաղաղության և կայունության ապահովումից բացի՝ ԵՄ-ն մեզ կաջակցի նաև բարեփոխումներ անցկացնելու հարցում»,- ասել է Ղարիբաշվիլին:
Նա նաև նշել է, որ Վրաստանի քաղաքացիների համար ԵՄ երկրների առանց վիզայի ռեժիմը կարելի է համարել եվրաինտեգրման ամենագրավիչ կարճաժամկետ արդյունքը, որը կարդարացնի հասարակության սպասելիքներն ու օգուտ կբերի վրաց ժողովրդին:
«Վրաստանը, Մոլդովան և Ուկրաինան, ինչպես Արևելյան գործընկերության երկրները, արդեն կատարել են իրենց պատմական ընտրությունը և ընտրել են եվրաինտեգրման ճանապարհը: Այդ երկրների միանշանակ ընտրությունն ընդունելով և ԵՄ-ին նրանց անդամակցության հեռանկարով, որքան էլ այն հեռու լինի, ԵՄ-ն անհավանականորեն կմեծացնի տարածաշրջանում խաղաղության, կայունության և տնտեսական զարգացման հնարավորությունները: Մենք ուրախ ենք, որ ԵՄ-ում այդ մոտեցման կողմնակիցների թիվը գնալով ավելանում է: Մենք հավատում ենք, որ շատ շուտով բոլոր եվրոպացի գործընկերները կխոստովանեն, որ այդ աջակցությունն իմաստուն որոշում էր»,- ասել է Ղարիբաշվիլին: