Երևանի քաղաքապետարանում տեղի է ունեցել հաշմանդամություն ունեցող անձանց հիմնահարցերով զբաղվող քաղաքային հանձնաժողովի հերթական նիստը, որի ընթացքում ամփոփվել են նաև 2014թ. առաջին կիսամյակի աշխատանքները:
Նիստին մասնակցել են քաղաքապետարանի մի շարք ստորաբաժանումների, վարչական շրջանների սոցիալական բաժինների ղեկավարներ, հանձնաժողովի կազմում եղած ու նոր ընդգրկված հասարակական կազմակերպությունների նախագահները: Նիստը վարել է հանձնաժողովի նախագահ, Երևանի քաղաքապետի առաջին տեղակալ Կամո Արեյանը: Մինչ օրակարգին անցնելը, «Ունիսոն» ՀԿ գործադիր տնօրեն Արմեն Ալավերդյանը հանձնաժողովի նախագահին է փոխանցել Երևանի քաղաքապետ Տարոն Մարգարյանին ուղղված շնորհակալագիրը` անհատույց օգտագործման իրավունքով Էրեբունի վարչական շրջանում իրենց կազմակերպությանը տրամադրված տարածքի համար:
Այնուհետ քաղաքապետարանի ստորաբաժանումների ղեկավարները հանդես են եկել վերջին եռամսյակում իրականացված աշխատանքների համառոտ հաշվետվությամբ: Ըստ այդմ, մայրաքաղաքում շարունակվում են հատուկ կարիքներ ունեցող մարդկանց սոցիալական աջակցության բազմաբնույթ ծրագրերը, այդ թվում գործում են 18 բարեգործական ճաշարաններ`520 շահառուներով: Կարևորագույն բաղադրիչներից է նաև մայրաքաղաքի փողոցներն ու հասարակական նշանակության վայրերը թեքահարթակներով կահավորելու ծրագիրը, որի ուղղությամբ աշխատանքներ են իրականացվում ինչպես համայնքային բյուջեի, այնպես էլ մասնավոր ընկերությունների միջոցներով: Նշվել է, որ մինչև տարեվերջ թեքահարթակների թիվը երևանյան փողոցներում կավելանա ևս 185 -ով: Ընդ որում, թեքահարթակներով կկահավորվեն նաև մայրաքաղաքում հիմնանորոգվող թվով 23 փողոցները:
Հաշմանդամներին ուղղված սոցիալական կարևորոգույն նախաձեռնություններից էր վերջերս Երևանի ավագանու որոշմամբ հաշմանդամների ու նրանց հավասարեցված անձանց ավտոկայանատեղիների տեղական տուրքերի վճարումից ազատելը: Երևանի քաղաքապետարանի տրանսպորտի վարչության պետ Հենրիկ Նավասարդյանը զեկուցել է, որ դրան զուգահեռ ընթանում են ավտոկայանատեղիներում հաշմանդամների տրանսպորտային միջոցների կայանման համար անհրաժեշտ կահավորման աշխատանքները: Բացի այդ, մինչև տարեվերջ հատուկ վերելակներ կտեղադրվեն տարբեր երթուղիների թվով 10 ավտոբուսներում: ՀԿ-ների ղեկավարները հանդես են եկել նաև նոր առաջարկներով, որոնք հանձնաժողովի նախագահի և անդամների կողմից ընդունվել են ի գիտություն:
