Երեկ «Հայկական ժամանակ»-ին հայտնի է դարձել, որ Հայաստանում Ամերիկայի Միացյալ Նահանգների դեսպան Ջոն Հեֆերնը այս շաբաթվա վերջին մեկնում է իր հայրենի երկիր: Ընդ որում` մեկնում է զգալիորեն երկար ժամանակով, նա Հայաստան կվերադառնա 2013-ի հունվարի աոաջին տասնօրյակում, հավանաբար` հենց հունվարի 10-ին: Իհարկե, ՀՀ-ում ԱՄՆ դեսպանները միշտ էլ այդ շրջանում մեկնել են` իրենց երկրում դիմավորելու Ծննդյան տոները: Այս տարի, սակայն, իրավիճակը բոլորովին այլ է. Հայաստանում երկուսուկես ամսից նախագահական ընտրություններ են, և այդ շրջանը պետք է որ հետաքրքրեր այդ երկրին: Առավել ևս, որ Հայաստանում ընթանում են քաղաքական, այսպես կոչված, խմորումներ քաղաքական կոնսուլտացիաների անվան տակ, և ԱՄՆ-ի դեսպանը պետք է որ բաց չթողներ դրանց մոտիկից հետևելու, իր ղեկավարությանն առաջին ձեռքից ինֆորմացիա փոխանցելու հնարավորությունը:
Այն, որ դեսպանն, այնուամենայնիվ, մեկնում է, երկու բան կարող է նշանակել, կամ՝ զեկուցելու ենթակա բան Հայաստանում չի կատարվում, կամ` ինչ-որ պետք է զեկուցեր, արդեն զեկուցել է, և վստահ է, որ առաջիկա մեկուկես ամսվա ընթացքում ոչինչ չի փոխվելու: Ավելի հավանական է երկրորդ տարբերակը:
Ի դեպ, երեկ այս տարբերակը հաստատող շատ ուղղակի հայտարարություն է արել արևմտյան փորձագետներից մեկը: «Chathman house» հետազոտական կենտրոնի փորձագետ Ջեյմս Նիքսին մամուլում ասել է. «Ընտրությունների ելքը դժվար թե առանձնակի արձագանք կամ խանդավառություն առաջացնի Վաշինգտոնում կամ Մոսկվայում»: Միտքը փորձագետն արտահայտել է ի պատասխան լրագրողի այն հարցի, թե Հայաստանի նախագահական ընտրություններում, ի վերջո, աշխարհաքաղաքական կողմնորոշումներից ո՞ր մեկը կհաղթի` արևմտյա՞նը, թե՞ ռուսականը: Փոձագետը թափանցիկ ակնարկ է արել, թե ՀՀ նախագահական ընտրություններն իրենց համար միանգամայն կանխատեսելի են և, փաստորեն, հույզեր` լավ կամ վատ իմաստով, բացարձակապես չեն առաջացնում:
Սպասվող նախագահական ընտրությունների թեմայի շուրջ կատարյալ անտարբերություն է սկսում տարածվել նաև մեր երկրի ներսում: Հայաստանում, կարծես, իր սաղմերն է գցում քաղաքական և հասարակական Մեծ դեպրեսիան, որի ներքո էլ կսկսվեն և կավարտվեն այս նախագահական ընտրnւթյnւնները: Սրանից ավելի մեծ նվեր Սերժ Սարգսյանին և իշխող քաղաքական ռեժիմին` հնարավոր չէր մատուցել: Մնացած բոլոր խոսակցությունները, գաղտնիության քողի տակ ընթացող քաղաքական գործընթացները միայն այս նվերի գեղեցիկ փաթեթավորմանն են ուղղված, հավելում է «ՀԺ»-ն:
