Վերաքննիչ քրեական դատարանում կայացավ Արսեն Սարգսյանի գործով հերթական դատական նիստը:
Ըստ մեղադրանքի՝ 30-ամյա Արսեն Սարգսյանը 2008 թվականի սեպտեմբերի 10-ի կեսօրին Դավթաշենում պատահաբար հանդիպել է մտավոր հետամնաց մի աղջկա՝ Է.-ին: Աղջիկը մոլորվել էր ու, մոտենալով Արսենին, խնդրել է, որ նա իր հեռախոսով զանգահարի եղբորն ու ասի իր գտնվելու վայրը: Արսենը, ըստ մեղադրանքի, օգտվելով հիվանդ աղջկա անօգնական վիճակից, նրան խաբեությամբ տարել է Հրազդան գետի աջ ափին գտնվող հողամասերից մեկը, կանչել իր երկու ընկերներին: Երեքով Է.-ին ստիպողաբար խմեցրել են, նրա կամքին հակառակ կատարել սեքսուալ բռնի գործողություններ, ապա աղջկան թողել ու հեռացել:
Սարգսյանը արգելանքի տակ է վերցվել 2012 թվականի մարտի 22-ից: Նա մեղադրվում է ՀՀ քրեական օրենսգրքի 139 հոդվածի 2-րդ մասի 1-ին կետով:
Արսեն Սարգսյանը չի ժխտել, որ դեպքի օրը Է.-ն Դավթաշենում մոտեցել է հենց իրեն, սակայն չի ընդունել, որ նրա նկատմամբ բռնի սեքսուալ գործողություններ է կատարել:
2008 թվականի սեպտեմբերի 10-ին Է.-ն տնից դուրս էր եկել, որ արհեստագործական ուսումնարան գնա: Վարսահարդարություն պիտի սովորեր, ու դա ուսումնական առաջին օրն էր լինելու նրա համար: Սակայն աղջիկը շփոթվել էր, իրեն հարկավոր կանգառում չէր իջել, եղբորը չէր հանդիպել ու հասել էր երթուղայինի վերջին կանգառը՝ Դավթաշեն: Այնտեղ հասկացել էր, որ մոլորվել է, ու մոտեցել էր փողոցում կանգնած Արսենին:
Քննչական գործողությունների ժամանակ աղջիկը ճանաչել էր Արսեն Սարգսյանին, իր ցուցմունքները պնդել էր նրա հետ առերեսման ժամանակ:
Շենգավիթ վարչական շրջանի ընդհանուր իրավասության դատարանը Ալեքսանդր Ազարյանի նախագահությամբ 2012 թվականի սեպտեմբերի 7-ի դատավճռով Արսեն Սարգսյանին մեղավոր է ճանաչել ու դատապարտել 6 տարի ազատազրկման:
Սարգսյանի շահերի պաշտպանը բողոքարկել է դատավճիռը՝ պահանջելով բեկանել այն, ուղարկել նույն առաջին ատյանի դատարան՝ այլ կազմով նորից գործը քննելու կամ՝ անպարտ ճանաչել ու արդարացնել Արսեն Սարգսյանին:
Վերաքննիչ քրեական դատարանում բողոքը քննում են նախագահող Սևակ Համբարձումյանը, դատավորներ Մանուշակ Պետրոսյանը և Արարատ Պետրոսյանը: Նախորդ դատական նիստի ժամանակ ամբաստանյալը հայտնել էր, թե ցանկանում է նոր պաշտպանի ներգրավել: Նիստը հետաձգվել էր այդ նպատակով:
Այս դատական նիստին ներկայացավ փաստաբան Հունան Բաբայանը: Նրա հետ պայմանագիր էր կնքել Արսեն Սարգսյանի կինը: Արսենն ամուսնացած է, նրա խնամքին երկու անձ կա:
Ամբաստանյալը հայտնեց, թե համաձայն է, որ վերաքննիչ դատարանում իր շահերը պաշտպանի փաստաբան Հունան Բաբայանը: Դատարանը պաշտպանին ներգրավեց: Վերջինս ողջամիտ ժամանակ խնդրեց, որ քրեական գործի չորս հատորներին ծանոթանա: Նիստը հետաձգվեց մինչև դեկտեմբերի 6-ը:
