Լիբանանի նախկին նախագահ եւ փաղանգավոր կուսակցության ղեկավար Ամին Ժեմայելին, ով վերջերս այցելել է Բաքու, ընդունել է Ադրբեջանի նախագահ Իլհամ Ալիևը: ՌԱԿ Լիբանանի շրջանային վարչության մամլո դիվանից տեղեկացնում են, որ Ռամկավար ազատական կուսակցության Լիբանանի շրջանային վարչությունը լիբանանահայության անունով ցանկանում է հուշել հարգելի նախկին նախագահին, որ նման այցելություններն ու ընդունելությունները՝ ինչ պիտակի տակ էլ դրանք լինեն, անհանդուրժելի են հայ ժողովրդի համար եւ վիրավորական:
«Մեզ համար անհասկանալի է լրատվական աղբյուրներից լսել, թե վերոհիշյալ կողմերը քննարկել են շրջանային երկրների դեմոկրատական գործընթացը՝ մինչ նախագահ Ժեմայելը քաջ գիտի, թե` Ադրբեջանը տակավին չի կարողացել մարսել տարածաշրջանում բնակվող ժողովրդի ինքնորոշման ազատության եւ անկախ ապրելու դեմոկրատական տարրական իրավունքը»,- նշում են մամլո դիվանից:
Այս առիթով, ՌԱԿ Լիբանանի շրջանային վարչությունն ուզում է հիշեցնել նախկին նախագահ Ժեմայելին եւ բոլոր այն լիբանանցի պատասխանատուներին, որոնք նման այցելություններ են ուզում անել` նկատի ունենան լիբանանահայ համայնքին զգացումները, գիտակցելով, որ հայ ժողովրդի հարցը միայն Թուրքիայի հետ չէ, այլև Ադրբեջանի, որ ոտնակոխելով ժողովրդավարական ամեն հասկացողություն, պատերազմական լարված վիճակի մեջ է գտնվում այսօր Հայաստանի Հանրապետության հետ` սպառնալով համայն հայ ժողովրդի եւ տարածաշրջանի երկրների դեմոկրատական գործընթացին: