Եգիպտոսը պատրաստվում է «ցասման երեքշաբթիի», որը կարող է ճակատագրական դառնալ Բուրգերի երկրի համար: Ինչպես հաղորդում է ITAR-TASS-ը, այսօր ողջ երկրով մեկ ընդդիմությունը պատրաստվում է զանգվածային բողոքի ակցիաներ անցկացնել Սահմանադրական հռչակագրի դեմ, որը ընդլայնում է նախագահ Մուհամմադ Մուրսիի իրավասությունների շրջանակը: Ընդդիմությունը, լիբերալ-դեմոկրատական ուժերի գլխավորությամբ, այս անգամ ուրբաթ օրվան չի սպասել: Նշենք, որ հենց ուրբաթ օրերին են եգիպտացիները 2 տարվա ընթացքում ավանդաբար իրականացրել իրենց «հեղափոխական գործերը»: :
Նախորդ «ցասման օրը», որը տեղի էր ունեցել օրերս, վերածվել էր պետության ղեկավարների հակառակորդների զանգվածային ելույթների և «Մուսուլման եղբարների» կենտրոնակայանի դեմ հարձակման, որի հետևանքով իսլամիստների 15-ամյա կողմնակից էր զոհվել:
Մայրաքաղաք Կահիրեի կենտրոնական Թահրիր հրապարակում վրանային ավան է ամրացվել:
Ամբողջ գիշեր դեպի հրապարակ տեղի է ունեցել իշխող վարչակարգի հակառակորդների հոսք, չնայած գլխավոր հավաքը նշանակված է տեղի ժամանակով Ժամը 17:00-ին (Երևանի ժամանակով 19:00): Արդեն որոշ փոքր խմբեր պարբերաբար ընդհարվում են ոստիկանության հետ: Իրավապահները նրանց դեմ արցունքաբեր գազ են կիրառում: Երկրի ՆԳՆ-ն նախապես հնարավոր միջադեպերի պատասխանատվությունը դրել է դրանք հրահրողների վրա:
