Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում հուլիսի 9-ին ընթացող դատական նիստին ամբաստանյալների փաստաբանները համատեղ հայտարարությամբ հանդես եկան հետազոտված տեսագրությունների արձանագրությունների վերաբերյալ:
Հայտարարությունը ներկայացնող փաստաբան, Շանթ Հարությունյանի պաշտպան Ինեսա Պետրոսյանը նշեց, որ երթի մասնակիցների թիվը չի գերազանցել 50-ը, իսկ իր պաշտպանյալը դիմադրությունը սկսել է այն բանից հետո միայն, երբ ոստիկանը քաշքշել է Շանթ Հարությունյանին, բռնել նրա վզից, քաղաքացիների նկատմամբ երթի մասնակիցները որեւէ բռնություն չեն կիրառել: Փաստաբանի խոսքով՝ նախքան երթը դադարեցնելը ոստիկանները մասնակիցներին չեն զգուշացրել երթի անօրինական լինելու մասին:
Պետրոսյանը նշեց, որ բախումը տեղի է ունեցել ոստիկաններից մեկի կողմից Շանթ Հարությունյանի նկատմամբ ֆիզիկական ուժ գործադրելուց հետո: Տեսագրություններում լսվում է Շանթի տասնչորս տարեկան որդու՝ Շահենի բղավոցը: Տղան գոռում է, ապա հորը ոստիկանների ճիրաններից ազատելու համար հարվածում է բարձրախոսով: Փաստաբանը նշեց, որ արձանագրության մեջ գրված է, թե Արմեն Հովհաննիսյանը հրում է ոստիկան Գեղամ Խաչատրյանին, մինչդեռ տեսագրությամբ այդ հանգամանքը չի հաստատվել:
«Ցեղակրոն» կուսակցության նախագահ, գործով ամբաստանյալ Շանթ Հարությունյանը, տեսագրության վերաբերյալ ելույթ ունենալով, հետաքրքրվեց՝ ոստիկանության դեպքում օրենքով պաշտպանվա՞ծ է քաղաքացիների նկատմամբ պրովոկացիաներ կազմակերպելն ու անպատիժ մնալը: Նիստը նախագահող դատավոր Մնացական Մարտիրոսյանը խորհուրդ տվեց հարցի պատասխանը ստանալ իրենց պաշտպանից: «Փաստաբանս ասաց՝ ոչ ոք իրավունք չունի քաղաքացու նկատմամբ պրովոկացիա կազմակերպել: Ժամանակին, երբ նոր էի ձերբակալված, ասացի, որ մեր կոնֆլիկտը եղել է ոստիկանության հետ, հիմա պնդում եմ, որ քննչական գործողությունը կատարի երրորդ մարմին, բայց ոստիկանությունը շահագրգիռ մարմին է, տվել են իրեն՝ քննությունը ինքը ծածկադմփոց անի: Դուք մերժեցիք, հասկանում եմ, որ քաղաքական պատվեր է: Քննիչներն էլ քաղաքական հաշվահարդարից ելնելով պրովոկացիա են արել, բազմակողմանի չեն քննում գործը»,- ասաց նա:
Հարությունյանը նշեց, թե իրեն հավասարակաշռությունից հանել են, ապա նշեց՝ եթե ոստիկաններն օրենքով սադրելու իրավունք ունեն, թող հայտարարեն: Նա նշեց, որ Վալերի Օսիպյանը թևանցուկ էր արել իրեն, և հիմա թող քննիչները պարզեն՝ ինչ էր ինձ ասում: Նա պահանջեց Օսիպյանից՝ ներկայանալ դատարան, պարզաբանումներ տալ:
Հարությունյանը նշեց. «Այստեղ տղերք կան, որ համամիտ են ինձ հետ, հակառուսական հայացքների հետ, կան տղերք, որ պրոռուսական են, բայց բոլորս մի նպատակ ենք ունեցել՝ Հայաստանի ժողովրդին իշխանությւոնները նպատակային առումով փչացնում են, այս իշխանությունները սրիկա են, պետք է հեռացվեն»,- ասաց նա:
