Ռուսաստանի վարչապետ Վլադիմիր Պուտինը Լիբիայում միջազգային ուժերի ռազմական գործողությունները անվանել է խաչակրաց պատերազմ` նշելով, որ ոչ մոք իրավունք չունի դրսից միջամտելու ներքաղաքական հակամարտություններին: Այս մասին հաղորդում է RIA-Novosti գործակալությունը:
Նա քննադատել է ՄԱԿ-ի բանաձևը` նշելով, որ այն լիարժեք չէ և թույլատրում է բոլորին անել ամեն ինչ ինքնիշխան պետության դեմ. «Սա ինձ խաչակրաց արշավանք կազմակերպելու միջնադարյան կոչ է հիշեցնում, երբ մեկը կոչ էր անում մեկ ուրիշին գնալ որոշակի տեղ և ինչ-որ բան ազատագրել»,- ասել է Պուտինը:
Նա հիշեցրել է ամերիկացիների գործողությունները Բելգարդում, Իրաքում և Աֆղանստանում: Նա նշել է, որ Քլինթոնի ժամանակ ռմբակոծվում էր Բելագրադը, Ջորջ Բուշի ժամանակ` Իրաքն ու Աֆղանստանը՝ այս շարքում դասելով նաև Օբամային: Պուտինն ամերիկյան քաղաքականությունն անվանել է անխիղճ և անտրամաբանական` ասելով, թե ինքնիշխան պետությունների գործերին ԱՄՆ միջամտությունը ձեռք է բերում կայուն միտում:
Ակնհայտ է, որ Ռուսաստանի ղեկավարության շրջանում լուրջ հակասություններ կան Լիբիայի հարցի շուրջ: Մամուլի հրապարակումներից պարզ է դառնում, որ նախագահ Մեդվեդևը կողմ է եղել բանաձևի ընդունմանը, սակայն ԱԳՆ-ն, որը հավանաբար ներկայացրել է վարչապետ Պուտինի դիրքրոշումը, ցանկացել է վետո դնել ՄԱԿ-ի 1973 բանաձևի վրա: Մենք տեղեկացրել էինք, որ, ի վերջո, իշխանական վերնախավում ընդունվել է փոխզիջումային դիրքորոշում, և ՄԱԿ-ում ՌԴ ներկայացուցիչը ձեռնպահ է մնացել:
