Հայաստան-Իրան գիտական և արդյունաբերական համագործակցությանը քաղաքական երանգ պետք չէ տալ, այն զուտ տնտեսական համագործակցություն է: Հուլիսի 8-ին լրագրողների հետ հանդիպմանը այս մասին նշեց տեխնիկական գիտությունների դոկտոր, պրոֆեսոր Վահան Համազասպյանը, ով գազի և էլեկտրաէներգայի թանկացման նոր այլընտրանք է առաջարկում` հելիոֆիկացիա:
«Ես գիտեմ հարյուր ձև Հայաստանի տնտեսությունը վերականգնելու համար, բայց ոչ մի ձև չեմ գտնում մեր չարքաշ մարդկանց դեմ պայքարելու համար: Արևային տեխնիկայի զարգացմամբ զբաղվել սկսել եմ 21 տարի առաջ: Նախարար Երվանդ Զախարյանը հայտարարում է, որ ծանոթ չէ սարքին, մինչդեռ շատ լավ ծանոթ է, անգամ նկարը կա այդ սարքի մոտ: Սա, կարծում եմ, պարզապես փախուստ է խնդրից: Խոշոր միջազգային պրոբլեմ է սա` էներգետիկայի հարցը, որ առայժմ մի կերպ լուծվում է, բայց հետո կդառնա անլուծելի»,- ասաց նա:
Համազասպյանն առաջարկում է հելիոֆիկացված գյուղեր` Հայաստանում` Տաշիրում, Ղարաբաղում` Թալիշ գյուղում: Նա առաջարկում է արևային սարքերի գործարաններ ստեղծել` իրենց փողերով, մեր տեխնոլոգիաներով: Գործարաններից մեկը պիտի լինի Հայաստանում, մյուսն` Իրանում, կողմերը պետք է գործարաններում հիսուն տոկոս բաժնետեր լինենլ Գիտնականը նշում է, թե իրանական կողմն անհանգիստ է, որ քաղաքական երանգ է տրվել, գրվել է իբրև` Իրանը պայքարում է ռուսական գազի դեմ, մինչդեռ դա իրականությանը չի համապատասխանում:
Համազասպյանն ասաց, որ հինգ առաջարկություն է ներկայացրել բիզնեսի համար, այն կուղարկեն ֆիրմաներին: Բանախոսը նշեց, թե բազային գործարանների արժեքը ութ միլիոն դոլար է կազմում, ինքն այսօր էլ պատրաստ է աշխատել, կարծում է` մեր ժամանակներում գործարանները տարիների խնդիր չեն, երկու ամսում կարելի է կառուցել: Արևային էներգիան կարելի է օգտագործել որպես տեխնոլոգիա` լույսի միջոցով սննդի վերամշակման համար, կարելի է սպիրտ ստանալ, չրեր պատրաստել, չորանոցներ: «Ինձ քննարկումների չեն հրավիրում, խուսափում են ինձ հետ հանդիպումից, վախենում են ճշմարտությունից, որովհետև ճշմարտություն եմ ասում: Մեզ էներգիան էնքան պետք չի, ինչքան էն աշխատատեղերը, որ կստեղծենք Հայաստանում, որ էսօր չորս դրամի համար էսքան չպայքարենք»,- ասաց նա:
