Հայ-վրացական հարաբերությունները խորանալու են՝ չնայած երկու երկրների տարբեր ինտեգրացիոն ուղիներին. «Առաջին լրատվական»-ի հետ զրույցում այս մասին ասաց Հայաստանում Վրաստանի դեսպան Թենգիզ Շարմանաշվիլիին՝ անդրադառնալով հայ-վրացական հարաբերությունների հեռանկարներին Վրաստանի եվրաասոցացման և Հայաստանի եվրասիական ինտեգրացիայի դեպքում, ապա նաև Վրաստանի և Հայաստանի միջև գաղտնի տեղեկատվության փոխանակման մասին կնքված պայմանագրին։
Հարցին, թե Վրաստանի եվրոպական ընտրությունը կարո՞ղ է օրինակ դառնալ Հայաստանի համար, նա պատասխանեց, թե բարձր մակարդակով Վրաստանն ասում է, որ հարգում է ՀՀ-ի ընտրությունը:
«Ես իրավունք չունեմ հիմա ասելու, թե ես կարող եմ օրինակ լինել, կամ մեկ ուրիշն է օրինակ ինձ համար: Ամենագլխավորն այն է, որ բոլոր ժողովուրդներն ունեն ազատ ընտրության իրավունք, այնպես որ, Հայաստանն է կատարել իր ընտրությունը, մենք ևս կատարել ենք մեր ընտրությունը: Եվ Հայաստանն է ասել, որ միանում է այդ պրոյեկտներին ոչ ի վնաս իր հարևանների, և մենք ենք հայտարարել այդ մասին: Այնպես որ, այդ մասին խոսք չի գնում հիմա: Մենք յուրաքանչյուրս մեր ինտեգրացիոն ուղին ենք ընտրել, բայց չնայած դրան, մենք խորացնելու ենք մեր երկկողմ հարաբերությունները»,- ասաց դեսպանը՝ կրկնելով, որ հարաբերությունները խորանալու են:
Անդրադառնալով Վրաստանում կնքված համաձայնագրին՝ նա ասաց, որ և Հայաստանում, և Վրաստանում ոչ մասնագիտական մակարդակով քննարկվել այդ համաձայնագրի հարցը: «Մարդիկ մտածել են, թե քանի որ մենք ստորագրել ենք կոնֆիդենցիալ տեղեկատվության փոխանակման մասին համաձայնագիր, նշանակում է, որ այն, ինչ կոնֆիդենցիալ է Հայաստանի համար, վաղը փոխանցվելու է Վրաստանին, նաև՝ հակառակը: Իհարկե ոչ: Այն ոլորտներում, որտեղ նրանք համագործակցում են, փոխանակելու են տեղեկատվություն: Իրականում դա վերաբերելու է ահաբեկչության վերաբերյալ տեղեկատվությանը, թմրանյութերի առևտրին և այլն, և այլն: Սա եղել է ոչ պաշտոնական համագործակցություն սովորաբար, և հիմա կա արդեն համաձայնագրային հիմք, թե ինչպես կարելի է փոխանակել տեղեկատվությունը»,- նշեց դեսպանը:
Առաջարկում ենք մանրամասներին ծանոթանալ տեսանյութի միջոցով: