ԵԱՀԿ-ի պաշտոնական կայքի փոխանցմամբ՝ ԵԱՀԿ Մինսկի խումբը տարածաշրջանային այցից հետո հայտարարություն է տարածել, որում ասվում է.
«ԵԱՀԿ Մինսկի խմբի համանախագահներ Ռոբերտ Բրադտկեն (ԱՄՆ), Իգոր Պոպովը (Ռուսաստան), Ժակ Ֆորը (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրշչիկը նոյեմբերի 19-26-ը այցելել են տարածաշրջան՝ շարունակելով ջանքեր գործադրել՝ օգնելու համար կողմերին Ղարաբաղյան հակամարտության խաղաղ կարգավորումը գտնելու հարցում:
Համանախագահները նոյեմբերի 23-ին Երևանում հանդիպել են Հայաստանի նախագահ Սարգսյանի և արտգործնախարար Նալբանդյանի հետ, իսկ նոյեմբերի 26-ին Բաքվում հանդիպել են նախագահ Ալիևի և արտգործնախարար Մամեդյարովի հետ: Համանախագահները նոյեմբերի 21-22-ը այցելել են Լեռնային Ղարաբաղ և հանդիպել տեղի դե-ֆակտո իշխանությունների հետ:
Նոյեմբերի 21-ին համանախագահներն այցելել են նաև Զանգելանի (Կովսական) և Ջաբրայիլի (Ջրական) շրջաններ՝ գնահատական տալու համար 2010 թվականի հոկտեմբերին կատարած իրենց վերջին այցից հետո այդ շրջաններում իրականացված փոփոխություններին:
Համանախագահները նախագահներ Սարգսյանին ու Ալիևին իրազեկել են օգոստոսին ու սեպտեմբերին արտգործնախարարներ Նալբանդյանի և Մամեդյարավի հետ իրենց ունեցած առանձին հանդիպումների արդյունքների մասին և քննարկել են խաղաղության գործընթացի շարունակման այն գաղափարները, որոնց նրանք նախարարներին ներկայացրել են հոկտեմբերի 27-ի համատեղ նիստում: Կողմերը պայմանավորվել են շարունակել հանդիպումներն արտգործնախարարների մակարդակով:
Համանախագահները նաև շնորհակալություն են հայտնել դեսպան Կասպրշչիկին և նրա թիմին՝ բարդ ժամանակաշրջանում հրադադարի ռեժիմի պահպանման վերահսկողության հարցում կատարած աշխատանքների համար»:
