Լատինամերիկյան երկու երկրի` Էկվադորի և Պերուի նախագահները շաբաթ օրը միասնաբար հանդես են եկել իրենց երկրների մամուլի քննադատությամբ՝ լրագրողներին մեղադրելով իշխանությունների մասին «վատ» խոսքերի համար, հաղորդում են պերուական լրատվամիջոցները:
Ռաֆայել Կորեան և Օլյանտա Ումալան էկվադորի Կուենկա քաղաքում համատեղ կոնֆերանս են հրավիրել, որը նվիրված է եղել Գուայկիլ ծոցի ջրերի համատեղ օգտագործմանը, սակայն հատուկ ուշադրություն է գրավել լրագրողներից մեկի հարցը Էկվադորում անկախ լրատվամիջոցների վիճակի մասին:
«Ամեն անգամ, երբ ինձ այդ մասին հարցնում են Եվրոպայում, ես պատասխանում եմ, որ այնտեղ երբեք մամուլին թույլ չէին տա այնպիսի զզվելի բաներ գրել, ինչպես անում են լրատվամիջոցները Էկվադորում: Չգիտեմ, արդյոք կարո՞ղ եմ նույն բանը ասել Պերուի մասին»,- նշել է Կորեան և փոխանցել խոսքը պերուացի գործընկերոջը:
Ումալան ամբողջովին համամիտ է եղել Կորեայի տեսակետին: «Պերուում նրանք հենց այդպիսին են»,- նշել է նա ծիծաղելով:
Իր հերթին, Կորեան հավելել է, որ լրագրողները պետք է լիակատար ազատություն ունենան, բայց նաև պատասխանատվություն կրեն այն ամենի համար, ինչի մասին գրում են:
