Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ շարունակվեց անչափահաս՝ 1996 թվականի նոյեմբերի 13-ին ծնված Արման Մ.-ի գործի դատական քննությունը:
Երևանի թիվ 65 ավագ դպրոցի 12-րդ դասարանն այս ուսումնական տարում ավարտած Արմանն իր կյանքի ամենաբարդ քննաշրջանի մեջ է հայտնվել:
Մի կողմից՝ նա դատարանում ամբաստանյալի կարգավիճակով դատական քննության մեջ է, ընդունել է մեղքը ու մեծ կյանք մտնելու առաջին քայլերն անում է նաև հանցավոր արարքի համար պատասխանատվության ենթարկվելու հեռանկարն աչքի առաջ ունենալով:
Մյուս կողմից՝ Արման Մ.-ն դատական քննությանը զուգահեռ որպես դիմորդ մասնակցել է միասնական ընդունելության քննություններին ու բավական բարձր՝ 54 միավոր է հավաքել պետհամալսարանի քաղաքագիտության բաժին ընդունվելու համար:
Ըստ մեղադրանքի՝ Արմանը 2013 թվականի դեկտեմբերի 5-ին, ժամը 12-ն անց 40 րոպեին իրենց դպրոցում աղջկա հարցով պարզաբանում ստանալու համար դասարանից դուրս է կանչել 11-րդ դասարանցի Միքայելին:
Վերջինիս հետ անմիջապես դասարանից դուրս են եկել նաև նրա մի քանի դասընկերները, այդ թվում՝ ներկա գործով տուժողներ Ռոլանդն ու Էրիկը:
Արմանի ու Միքայելի միջև վիճաբանություն է ծագել հենց դպրոցական միջանցքում:
Արմանը ձեռքով հարվածել է Միքայելին:
Խառնվել են վերջինիս դասընկերները, և տուժել են հենց նրանք՝ Ռոլանդն ու Էրիկը:
Արմանը, ըստ մեղադրանքի՝ երկու անձի մարմնական վնասվածք պատճառելու դիտավորությամբ սուր կտրող-ծակող գործիքով հարվածել է Ռոլանդի գոտկային շրջանին, ինչպես նաև Էրիկին՝ երկուսի առողջությանն էլ պատճառելով միջին ծանրության վնաս՝ առողջության տևական քայքայումով:
Տուժողներն ապաքինվել են, հաշտվել են ամբաստանյալի հետ:
Արման Մ.-ին մեղադրանք է առաջադրվել ՀՀ քրեական օրենսգրքի 113 հոդվածի 2-րդ մասի 1-ին կետով:
Որպես խափանման միջոց՝ կիրառվել է անչափահաս ամբաստանյալին ծնողների հսկողությանը հանձնելը:
Ընդհանուր իրավասության դատարանում Արման Մ.-ն իրեն լիովին մեղավոր է ճանաչել, զղջացել կատարածի համար:
Խոշոր, պարզ աչքերով դեռահասը և նրա շահերի պաշտպանը իրենց պաշտպանական տակտիկայով՝ մեղքն ընդունելով, կատարածի համար զղջալով, տուժողների հետ հաշտ լինելով ու համեստ պահվածքով շահեցին դատավարության կողմերի համակրանքը:
Մեծ նշանակություն ունեցավ նաև Արմանի կողմից ընդունելության քննությունները բավական ծանր պայմաններում բավական հաջող հանձնելը. ուրեմն էականորեն նվազել է նրա արարքի հանրային վտանգավորության աստիճանը, ինչը կարևոր է նրա նկատմամբ պատիժ սահմանելու հարցում:
Մեղսագրված արարքի համար օրենքով նախատեսվում է առավելագույնը՝ 5 տարի ազատազրկում:
Այսօր ճառերի փուլն էր: Ու մեղադրող Ա. Մարգարյանը հանդես եկավ մարդասիրական ճառով: Նա միջնորդեց մեղավոր ճանաչել Արմանին, դատապարտել ազատազրկման, բայց նրա նկատմամբ պայմանական դատապարտություն կիրառել ու սահմանել 1 տարի 6 ամիս փորձաշրջան:
Խաղաղ ու հանդարտ մթնոլորտում անցկացված դատական քննության այս փուլում լիակատար համաձայնություն էր տիրում դատավարության կողմերի միջև:
Ամբաստանյալի շահերի պաշտպան Հ. Օսեփյանը միացավ մեղադրողի միջնորդությանը ու մեկ անգամ ևս միջնորդեց, որ իր պաշտպանյալի նկատմամբ պայմանական դատապարտություն կիրառվի, սահմանվի փորձաշրջան և հնարավորություն ընձեռվի, որ բուհ ընդունված երիտասարդը սկսի ուսումնառությունը՝ իր նկատմամբ դրսևորված վերաբերմունքից համապատասխան դասեր քաղելով:
Արմանը դատարանին խնդրեց իր նկատմամբ մեղմ վարվել, հնարավորություն տալ սովորելու՝ առանց հասարակությունից մեկուսացվելու:
Դատարանը հեռացավ խորհրդակցական սենյակ:
Դատավճիռը կհրապարակվի հուլիսի 4-ին: