Ինչպես արդեն տեղեկացրել ենք, 2012 թվականը մեզ համար կնշանավորվի ևս մեկ սպորտային կարևոր իրադարձությամբ: AIBA բռնցքամարտի Աշխարհի 2012թ. երիտասարդական առաջնությունը կանցկացվի Երևանում: 1in.am Sport-ը հանդիպեց Հայաստանի բռնցքամարտի ֆեդերացիայի նախագահ Արման Մուրադյանի հետ:
-Որքա՞ն է կազմում մրցաշարի բյուջեն:
-Առաջնության բյուջեն 320 մլն դրամ է:
-Ե՞րբ վերջնական տեսքի կգա մարզադահլիճը:
-Մրցաշարի բացումը լինելու է ամսի 28-ին: Մինչ այդ պատրաստ կլինենք:
-Ադրբեջանցիներին մեր երկրում ընդունելու անվտանգության երաշխիքներ տվեցինք: Արդյո՞ք պատրաստ են նրանք մեզ նման երաշխիք տալ և եթե տան, ապա մեքն կմասնակցե՞նք այդ առաջնությանը, թե ոչ:
-Մենք 2 տարի առաջ մասնակցել ենք երիտասարդների աշխարհի առաջնությանը, և նրանք մեզ երաշխիքներ տվել են և ապահովել են մեր հավաքականի անվտանգությունը: Հիմա նույնը նրանք պահանջել են մեզնից, և պետության մակարդակով դա տրվել է:
-Հայաստանի սահմաններից դուրս որքանո՞վ է պրոպագանդված մրցաշարը:
-Բռնցքամարտի աշխարհը գիտի, որ AIBA-ն այս տարի երկտասարդների աշխարհի առաջնությունն անցկացնում է Հայաստանում: Դա պոպուլիզացման համար մեծ քայլ է` հայկական բռնցքամարտն աշխարհում ավելի բարձր մակարդակի հանելու, երկրում մարզաձևի զարգացումը խթանելու համար:
-AIBA-ի ներկայացուցիչները եղան Հայաստանում: Ինչպե՞ս գնահատեցին նախապատրաստական աշխատանքները:
-Մենք ոչ մի խնդիրներ չունենք: Բոլոր հարցերն օրակարգի մեջ են: AIBA-ն այստեղ ունի աշխատախումբ, որոնք աշխատում են ֆեդերացիայի անձնակազմի հետ: Դելեգացիաներն արդեն ժամանում են, աշխատանքն իր հունով ընթանում է:
-Ի՞նչ սպասելիքներ ունեք: Ինչպե՞ս կներկայանա մեր հավաքականը:
-Մենք ունենք պատրաստված տղաներ, ստաբիլ թիմ և մեծ սպասելիքներ, բայց արդյունքները չեմ գուշակի: Սպասելիքները մեծ են:
-Կրկին մեզ վստահվեց բռնցքամարտի խոշոր մրցաշար անցկացնել: Հետագայում ևս խոշոր մրցաշարեր Հայաստան բերելու նախագծեր կա՞ն:
-Մենք արդեն անցկացնում ենք աշխարհի երկրորդ առաջնությունը` 2009թ.-ից հետո: Բացի այդ, մենք ամեն տարի միջազգային մրցաշարեր ենք անցկացնում: Մեր ֆեդերացիան այդ փորձն ունի: Այսօր մենք անցկացնում ենք առաջնություն և դրանից գոհ ենք:
