Հայաստանի և Ադբեջանի կողմից ստացված արտահանման և առևտրային արտոնագրերի վերաբերյալ հայցերի մանրակրկիտ ուսումնասիրությունից հետո Մեծ Բրիտանիայի կառավարությունը կշարունակի պահպանել ԵԱՀԿ-ի էմբարգոն զինվորականների, ոստիկանության, անվտանգության ուժերի և նրանց հետ կապված կառավարական կազմակերպությունների վրա, որոնց կողմից դա կարող է օգտագործվել Ղարաբաղում և Հայաստանի ու Ադրբեջանի սահմանին: Ինչպես հաղորդում են ադրբեջանական լրատվամիջոցները՝ վկայակոչելով «Նովոստի Արմենիա» գործակալությանը, նման հայտարարություն է տարածել Մեծ Բրիտանիայի ԱԳՆ ապարատի՝ Եվրոպայի հարցերով պետնախարար Դևիդ Լիդինգթոնը:
Ինչ վերաբերում է այնպիսի ռազմական սարքավորումներին, որոնք չունեն տեխնիկական հնարավորություններ Լեռնային Ղարաբաղում կամ Հայաստանի ու Ադրբեջանի սահմանին կիրառման համար, ապա Մեծ Բրիտանիայի կառավարությունը կուսումնասիրի արտոնագրի ստացման հայցերը՝ համապատասխան ԵՄ և ազգային արտահանման արտոնագրային չափանիշների:
Լիդինգթոնը նշել է, որ Հարավային Կովկասը ռազմավարական նշանակություն ունի Մեծ Բրիտանիայի համար: «Հայաստանի և Ադրբեջանի հետ գործընկերության հարցում Մեծ Բրիտանիան շարունակում է աշխատել՝ հանուն տարածաշրջանում խաղաղության, անվտանգության և փոխըմբռնման: 2012-2013թթ. Մեծ Բրիտանիան ֆինանսավորել է 1.245 մլն ֆունթ սթեռլինգի նախագծեր՝ Ադրբեջանի և Հայաստանի միջև խաղաղություն հաստատելու նպատակով: Լեռնային Ղարաբաղի հարցում մենք ֆինանսավորել ենք մի շարք նախագծեր՝ ուղղված հակամարտության խաղաղ կարգավորման հնարավորությունների ամրապնդմանը և աշխատելով Հայաստանի, Ադրբեջանի և Լեռնային Ղարաբաղի քաղաքացիական հասարակությունների հետ»,- ասել է նախարարը:
Լինդինգթոնը նշել է, որ իրենք վճռականորեն աջակցում են ԵԱՀԿ Մինսկի խմբի առաքելությանը և հենց այդ պատճառով է, որ Մեծ Բրիտանիան շարունակում է պահպանել էմբարգոն զենքի մատակարարումների վրա:
