ԱՄՆ խոշոր խանութների մոտ «սև ուրբաթ օրը» գոյացել են հսկայական հերթեր։ Այս օրը, ինչպես հաղորդում են տեղի ԶԼՄ-ները, ողջ երկրով մեկ սկսվում են Սուրբ Ծննդյան զեղչերը: Հեռուստաալիքները կադրեր են ցուցադրում, թե ինչպես է գնորդների մեծ հոսքը ներթափանցում խանութ, որտեղ դրամարկղի մոտ մեծ հերթեր են առաջանում:
Նոյեմբերի չորրորդ հինգշաբթի օրն (այս տարի նոյեմբերի 22-ը) ԱՄՆ-ում նշում են Գոհաբանության օրը, որին հաջորդում է «սև ուրբաթը»` օր, երբ սկսվում է զեղչերի ակտիվ շրջանը:
«Սև» բառը վերաբերում է առևտրական ընկերությունների ֆինանսական ցուցիչներին, որոնք սովորաբար այդ օրը դուրս են գալիս «կարմիր»՝ անշահավետ գոտուց: Պաշտոնապես այս օրն ԱՄՆ-ում աշխատանքային է, սակայն շատ ամերիկացիներ լրացուցիչ հանգստյան օր են վերցնում և երեք օր անցկացնում են Ամանորի և Սուրբ Ծննդյան նվերներ ընտրելով։
